Muqdisho (SONNA): Waxaa isbitaalka hooyada iyo dhalaanka ee Banadir soo booqday wafdi balaaran oo ka socday safaaradda Shiinaha ee Soomaaliya, oo uu hoggaaminayo Safiirka Dowladda China u fadhiya Soomaaliya Mudane Wang Yu. Wafdiga waxaa si diiran ugu soo dhaweeyay Dr. Mohamed Bulaale, wasiir ku xigeenka wasaaradda caafimaadka, iyo Dr. Fartun Sharif Mohamed, agaasimaha guud ee isbitaalka, oo ay weheliyaan maamulka iyo shaqaalaha isbitaalka.
Safiirka Shiinaha, Mr. Wang Yu, ayaa muujiyay dareenkiisa ku aaddan sida ay ugu faraxsanyihiin isbitaalka Banadir iyo kaalinta muhiimka ah ee uu bulshada ku leeyahay. Wuxuu ballanqaaday in Shiinaha uu si weyn u garab istaagi doono isbitaalka, si loo taageero adeegyada caafimaad ee sare.
Dr. Mohamed Bulaale ayaa sidoo kale bogaadiyay horumarka la sameeyay tan iyo markii la dhisay isbitaalka Banadir sanadkii 1976-dii oo ay Dowlada China gacan wayn ka gaysatay dhismahiisa. Wuxuu carabka ku adkeeyay muhiimada ay leedahay in la sii wado horumarinta adeegyada caafimaad, iyadoo la tixgelinayo baahiyaha bulshada.
Booqashadan waxay muujinaysaa xiriirka xooggan ee ka dhexeeya Soomaaliya iyo Shiinaha, iyo sida ay labadooduba uga go’an tahay in ay ka shaqeeyaan horumarinta caafimaadka iyo taageerada bulshada.
