Muqdisho (SONNA)- Shaqaalaha Rayidka ee Wasaaradda Beeraha iyo Waraabka Xukuumadda Soomaaliya ayaa ka qeyb qaatay wareegga sideed iyo tobanaad ee barnaamijka isxilqaan ee lagu dhisayo xarumaha Danta Guud, kaasi oo qeyb ka ah dadaallada dib loogu dhisayo xarumihii loogu adeegi jiray bulshada.
Qaar ka mid ah shaqaalaha Wasaaradda Beeraha iyo Waraabka oo ka hadlay muhiimadda barnaamijka Isxilqaan iyo sida ay ugu qeyb qaadanayaan xarumaha danta guud ayaa xusay inay aad ugu faraxsanyihiin in ay buuxiyaan kaltanka Wasaaradda uga soo aaday dib u dhiska xarumaha danta guud, waxaana ay barnaamijka ka fuliyeen xarunta Maktabadda Qaranka.
Agaasimaha xiriirka bulshada ee Wasaaradda Beeraha Xukuumadda Federaalka Soomalaiya mudane Cabdinaasir Cumar Cusman ayaa kula dardaarmay shaqaalaha rayidka dowladda Soomaaliya in ay ka qeyb qaataan howlaha dib loogu dhisayo xarumaha dalka.
Barnaamijka Isxilqaan ayaa waxaa horey loogu soo dhisay xarumo muhiim ah oo kuwa danta Guud, waxaana socda dadaallo dib loogu soo celinayo bilicdii ay caasimaddu lahayd.
