Muqdisho(SONNA):-Madaxweynaha Maraykanka ayaa martigelinya madaxweyneyaasha 50 dal oo Afrika ah shirkan ayaa loogu magac daray Shirweynaha Maraykanka iyo Afrika iyadoo dal walba danihiisa gaarka ah iyo sidii uu wax ula qaybsan lahaa dalka maraykanka kusoo bandhigi doono madashan, ayey haddana madaxda Afrika waxay fursad u haystaan in ay si midaysan iskaashi siyaasaddeed iyo mid dhaqaale ugula heshiiyaan maraykanka taas oo faa’iidooyin badan u leh,iyadoo qorshaha Cusub ee maraykanka iyo xulufaddiisu ay ugu talo galeen dalalka Afrika sida jaantuuska lagu xusay ku baxayso lacag gaaraysa ilaa $600 boqol oo Bilyan,tan oo kor u qaadaysa dhaqaalaha Afrika iyo kaabayaasha dhismaha.
Shirkan ayaa Loogu talo galay in looga hadlo Siddeed qoddob ( 8 ) oo kala ah.
1- kobcinta ka qeybgal dhaqaale oo cusub.
2-horumarinta nabadda, amniga, iyo maamulka wanaagga.
3-taaba-gelinta nidaamka dimuqraadiyadda, xuquuqda aadanaha iyo bulshada rayidka.
4-in si wadajir ah looga shaqeeyo xoojinta amniga caafimaadka gobolka iyo kan caalamiga ah.
5- kor u qaadida sugnaanta cuntada.
6- wax ka qabashada dhibaatada cimilada Aduunka.
7- xoojinta xiriirka qurba-joogta iyo ka qaybgalka horumarinta dalalka.
8- horumarinta waxbarashada iyo hoggaanka dhalinyarada Afrika.
Soomaliya shirka iskaashiga Maraykanka iyo Afrika.
Madaxweynaha Jamhuuriyadda Federaalka Soomaliya mudane Xasan sheekh Maxamuud iyo wafdi culus oo uu hoggaaminayo ayaa shirkan uga qayb gelaya iyadoo durba madaxweynuhu bilaabay kulamadda muhiimka ah ee uu la qaadanayo Madaxda ugu saraysa Dowladda Maraykanka isagoo la wadaagay horumaradda la taaban karo ee laga gaaray Dowlad dhiska Soomaliya iyo Dagaalka lagaga xoraynayo dalka kooxaha Khawaariijta iyo sida kooxda khawaarijtu u burburisay kaabayaashii nolosha deegaannada laga xoreeyey intii ay xukumayeen.
Madaxweyne Xasan Sheekh Maxamuud kulan doceed la qaatay Safiirka Maraykanka ee Qaramada Midoobey Marwo Linda Greenfield, isagoo la wadaagay guulaha laga soo hooyey dagaalka ka dhanka ah Khawaariijta waxa uuna tilmaamay saameynta cuna-qabateynta dhanka hubka ee saaran Soomaaliya ku yeelatay hawlgalka dib u xoreynta dalka isagoo sheegay in si naf hurnimo leh ay ciidamada Soomaaliyeed ku xoreeyeen gobollada Shabeellaha Dhexe iyo Hiiraan,Madaxweynaha ayaa ka rajeeyey diblumaasiyadda Maraykanka in ay codkooda Golaha Ammaanka iyo Golaha loo dhanyahay ee Qaramada Midoobey ay ku xoojiyaan qorsheyaasha dib u dhiska ciidamada Soomaaliya, qaadista cunaqabateynta hubka, ka hortagga isbeddelka cimilada iyo dib u dhiska deegaannada laga xoreeyey Khawaarijta.
Madaxweyne Xasan Sheekh Maxamuud ayaa sidoo kale kulan doceed ku saabsan xasilloonida Gobolka iyo isku xirka arrimaha gargaarka binu aadantinimada la qaatay Xoghayeyaasha Arrimaha Difaaca iyo Dibadda ee dalka Maraykanka.
Kulanka ayaa waxaa ka qeyb-galay Madaxweyneyaasha dalalka Jabuuti Mudane Ismaaciil Cumar Geelle iyo Nayjar Mudane Mohamed Bazoum, waxayna Madaxdu adkeeyeen dhibaatada argagixisadu ay ku hayso horumarka iyo xasilloonida qaaradda, iyadoo si wadajir ah loo bogaadiyey guulaha muhiimka ah ee Ciidamada Soomaaliyeed ay ka gaareen howgallada xoreynta deegaannada Shabeellaha Dhexe iyo Hiiraan.
Madaxweynaha Jamhuuriyadda ayaa soo bandhigay dhibaatada xooggan ee abaaruhu ay u geysteen nolosha dadka Soomaaliyeed iyo sida isbeddelka cimiladu uu qeyb weyn uga yahay, waxa uuna bogaadiyey qorsheyaasha ku saleysan in wadajir la isaga kaashado arrinkaas, iyadoo dowladda Soomaaliya ay mudnaan gaar ah siineysa daryeelka deegaanka iyo la qabsiga isbeddelka cimilada.
SONNA EDITOR.
