Muqdisho (SONNA): Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamsa Cabdi Barre, ayaa xafiiskiisa ku qaabilay wafti ka socda Baarlamaanka Nabadda iyo Iscafinta Adduunka oo uu hoggaaminayo guddoomiyaha aqalkaas Mudane Axmed Bin Maxamed Al-Jarwaan.
Mudane Xamsa ayaa waftiga ka dhagaystay farriimihii ay sideen oo u badnaa muhiimadda ay leedahay nabadda iyo iscafinta, iyo sidoo kale ujeeddada socdaalkooda oo daarnaa sidii heshiis is afgarad ah u wada saxiixan lahaayeen baarlamaanka adduunka iyo kan Soomaaliya.
Ra’iisul Wasaaraha ayaa waftiga uga mahadceliyay booqashadooda, wuxuuna la wadaagay aragtida madaxda qaranka ee ku dhisan “Soomaali heshiis ah, dunida heshiis la ah”, iyada oo Xukuumadda DanQaran ay hawl badan ka qabatay xagga soo celinta nabadda iyo waliba heshiisiinta bulshada.
Waftiga waxaa xubno ka ahaa xildhibaanno ka socda baarlamaanka dalka aan walaalaha nahay ee Jabuuti, waxayna kala ahaayeen Mudane Cilmi Maxabah Walla iyo Mudane Cabdoow Kaamil Maxamed. Waxaa waftiga kulanka ku wehliyay xildhibaanno iyo ma’uuliyiin hore oo Soomaaliyeed.
Mudane Xamsa Cabdi Barre ayaa guddoomiye Axmed Bin Maxamed guddoonsiiyay hadyad khaas ah oo uu ku xardhanyahay neef geel ah oo ka mid ah astaamaha shacabka Soomaaliyeed, taas oo ka tarjumaysa hoddantinimada ummaddeed iyo u adkaysiga duruuf kasta.
