Baydhabo, (SONNA): Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa guddoomiyey shirka Wasiirradaย Golaha Dowlad-goboleedka Koonfur Galbeed oo ka qabsoomay magaalada Baydhabo.ย
Shirka ayaa diiradda lagu saaray wada shaqaynta iyo xoojinta adeeggyada muhiimka ah ee la gaarsiinayo bulshada deegaannada Koonfur Galbeed, arrimaha siyaasadda, dhaqaalaha, amniga, iyo dardar-gelinta dagaalka ka dhanka ah khawaarijta.
Madaxweynaha Dowlad goboleedka Koonfur Galbeed Mudane Cabdicasiis Maxamed Xasan (Laftagareen), oo kulanka ka hadlay ayaa soo bandhigay warbixin la xiriirtaa xaaladaha bulsho iyo nololeed ee ka jira deegaanka, gaar ahaan dhinacyada amniga,siyaasadda, dhaqaalaha iyo dagaalka lagu ciribtirayo kooxaha Khawaarijta ah.
Ra’iisul Wasaaraha ayaa golaha ku adkeeyey muhiimada ay leedahay in la xoojiyo wada shaqaynta u dhaxaysa Dowladda Federaalka iyo Koonfur-Galbeed, si loo xaqiijiyo qorsheyaasha horumarinta iyo xoreynta, isaga oo soo bandhigay sida ay dowladda uga go’an tahay in la dhammaystiro howlgallada dalka lagaga xoreynayo khawaarijta, gaar ahaan deegaannadan oo ay argagixisadu caqabad ku yihiin nabadda, horumarka iyo xasilloonidooda.
Ra’iisul Wasaare Xamsa ayaa xusay in Xukuumadda DanQaran ay ka go’an tahay in la xoojiyo arrimaha dhaqaalaha iyo amniga, iyada oo muhiimad gaar ah la siinayo difaaca madaxbannaanida iyo midnimada dalka, waxa uuna ku bogaadiyey dadka Koonfur-galbeed doorka ay kuu leeyihiin dowladnimada.
