Baydhabo-(SONNA)-Ku-xigeenka Ergeyga Gaarka ah ee Qaramada Midoobay ahna Isku-duwaha Arrimaha Bani’aadannimada ee Soomaaliya, Mudane George Conway ayaa sheegay in xaaladda bani’aadannimo ee Soomaaliya ay weli tahay mid adag, isla markaana ay jirto baahi ballaaran oo u baahan gurmad degdeg ah.
Ergeyga oo hadal ka jeediyay Shirka Madasha Arrimaha Bani’aadannimada (CHF 2025) ayaa tilmaamay in hoos u dhaca ku yimid maalgelinta kaalmada bani’aadannimo ay halis gelinayso adeegyada aasaasiga ah ee ay bulshadu u baahan tahay.
Mudane Conway, ayaa muujiyay baahida loo qabo in dhammaan dhinacyada sida; hay’adaha Qaramada Midoobay, hay’adaha samafalka (caalami iyo maxalli), dowladda, deeq-bixiyaasha, ururrada bulshada rayidka ah, ganacsiga gaarka loo leeyahay iyo qurbo-joogta Soomaaliyeed ay si dhab ah ugu istaagaan arrimaha bani’aadannimada.
