Hibaad Cali Dasar waa Shahiid iska diiday inuu ku dul noolaado heeryada kooxda Maafiyada khawaariijta ah, islamarkaana iba furay in Argagixisada Khawaarijta ah lala dagaallami karo, welibana laga adkaan karo, waxuu ahaana Shahiid si fudud uga saaray Khawaarijta deegaankii uu ku noolaa, balse ku soo gadaal noqdeen markii uu waayay garab dowladeed iyo mid deegaameed intaba.
Taliyihii aas-aasay Macaawisleyda Soomaalida ayuu ahaa, bixiyayne magaca hadda loo yaqaan Ciidamada Deegaanka ee (Macaawisleyda), islamarkaana rumeeyay ama iftiimiyay in beeluhu ay la dagaallami karaan Khawaarijta ku soo duushay, wuxuuna geeriyooday sanadkii 2018-kii, isaga oo deegaankiisa cadawga ka difaacaya. Naxariistii janno Alle ha ugu bishaareeyo.
Wey dhacdaa in Qof uu Naftiisa u huro, badbaadinta, Dalkiisa, Koox ama Qof kale oo uu xushmo u hayo, sida Hogaamiye, Waalid, Macallinkiisa, Saaxiibtii/Saaxiibkii ama Qof kale oo uu jecel yahay.
Waxaase is weeydiin mudan, Ciddii uu naftiisa u huray fal celinta laga fili karayo iyo sida ay u gudato waajibka saaran.
Soomaaliya siyaaba kala duwan ayay u dhacdaa Naf huriddu.
- Dagaalkii 77 Ciidamo ayaa isku xiray Bambooyin si ay u jabiyaan Dhufeeysyadii Godeey.
- Naf hurid, Waxaa ugu Dambeeyay Marxuum, Axmed Cabdulqaadir Sh. Maxamud iyo Maxamed Cumar Xirsi oo Dagaaladii ugu damberyay ee Galmug si Geesinimo leh, Naftooda ugu huray si ay u badbaadiyaan Madaxdooda iyo Waalidiintood.
- Waxaa kale oo Xusid Mudun, Dagaalkii lagu soo qaaday Hotel Maa’idda halkaa oo ay ku sugnaayeen Laba Madaxweyne oo la rabay in la dilo, ayaa labo Gaadiidka qafilan ee Beebehu waxa ay ka soo weerareen Labadda dhinac ee Ex-Baarlamaan, mid dhinaca waqooyi ee xiga Ex- Isbitaal Rabo iyo ex- Koogaar Restaurant. Midna dhinaca koofure ee xiga ex- Dukaanka Zulfiqaar Cali. Labaduba waxa ay ridayeen Rasaas Dalooliso ah si Gaadiidka technikada ah ee ka soo horjeedo ay Matoorka uga gubaan kadibna ay toos u tagaan Hoteelka, Rasaastii lagu ridayay Beebahu wey kari weeyday.
Dhinaca waqooye ee Beebayaasha, waxaa Gaarigii Technikada ahaa ee uu watay ula dhaqaaqay Marxuum, Cali Jubba, Beebihii ayaa u qaatay in uu isku qarxinayo dib ayuuna u cararay, Cali Juba kama istaagin ee toos ayuu ugu dhuftay. Beebihiihii oo dhaawac ah ayaa u cararay dhinaca Taaladda Dal jirka dahsoon, waxaana Halkaa ku geeriyooday Marxuum Cali Juba oo Baabuurkiisii toos ugu dhuftay Beebihii.
Dhinaca Koofure waxaa isna Baabuurkiisii Technikada ahaa la dhaqaaqay Xuseen Maxamed Rage oo lagu Naaneyso “Shiino Asgari” . Sidii oo kale Beebihii ayuu ku dhuftay Gaarigiisii, Beebihiina waxa uu u cararay dhinaca Ex- Baarlamaan,waxa uuna ku cararay Wadada aado Bangiga dhexe. Baabuurkii Shiino Asgari waa burburay, Isagiina dhulka ayuu ku dhacay, Meyd ahaan ayaa looga tagay. Mar dambe ayaa la arkay in uu Nuuxnuuxsanayo oo uu nool yahay, waxaa loola cararay Isbitaalka, muddo kadib ayuuna ka soo kabtay Jajabkii iyo dhaawacii, Hadda waa nool yahay welina waxa uu ka tirsan yahay Ciidanka Qaranka.
- Bishii July ee Sanadkaan 2023-ka, iyada oo Ciidamo lagu tababarayo Xerada Jaalle Siyaad ayaa waxaa mar kaliya la dareemay Nin isku soo xiray waxyaabaha qarxo, Qof ayaa ku qeyliyay war Ninka qarax ayaa ku xiran. Isla markii Marxuum Axmed Maxamed Macallin Maxmuud oo loo yaqiin “Cag madhige” ayaa isku duubay Ninkii, si uu uga badbaadiyo Saaxiibadii, isla Goobtii ayuuna ku geeriyooday Marxuum Cag madhige.
Ma ahan intaasi Qof oo kaliya ee Dad badan oo xata ay ku jiraan, kuwii ay iska soo hor jeedeen ayaa Naftooda ku waayay ama Halis u galiyay si ay ugu dhintaan aragti ay aaminsan yihiin iyo Badbaadinta Dad agtooda ixtiraam ku leh.
5. “Inkasta oo aan gabar ahay.. Hubkaan guudka saarayaa
Rasaastaan gardaadsanayaa..Guul sida ragaygaan
Goobaha dagaal..Garab joogsanayaa”.
Fadumo Maxamud Ibraahim waxay aheyd Hooyo seddax Caruur ah leh, waxay iyada iyo Xabiibo Maxamed Odowaa la Shahiideen Walaalahoodii raga ahaa ee ku dhintay dagaalkii adkaa ee furinta Bur-ujeed dhowr maalin ka hor ku dhexmaray cadawga khawaarijta Al-Shabaab iyo ciidanka Deegaanka. Faadumo iyo geesiyada kale waxay doorbideen in ay qeyb ka noqdaan xilli taariikheedka ku qormaya xusuusta Qaran ee ay Soomaali iskaga xorayneyso Argagexisada kooxda Shabaab.
Wiilasha iyo Hablaha ku Shahiiday dagaalka waxay daafacayeen diinta, nafta, sharafta, iyo hantida dalkooda, dadkooda iyo deegaankooda intaba, waana ujeedooyinkii ugu waawaynaa ee ay diinta u soo degtay, waxayna u dirireen Janno Aakhiro iyo Jiritaan Xornimo.
Ugu dambeyntii Alle Shahaadada haka aqbalo Faadumo iyo geesiyadii kale ee furinta Bur-ujeed ku shahiiday, iyo kuwii hortood furumaha dagaalka ee kala duwan ku Shahiiday, Allahana u booga-dhayo inta dhaawaca ah. Aamiin
Haddaba Su’aashu waxa ay tahay, Dadkaasi Doorkoodii waa guteen, ee Qofkii ama Bulshadii ay dartood Naftooda u hureen, maxay ku xasuustaan, Dalacaad Geeridooda kadib, u duceyn, Daryeel Caruurtooda, in Taariikhdooda Dugsiyada lagu baro Jiilka dambe in lagu magacaabo Goobo lagu xasuusto?.
