Muqdisho(SONNA) Akadeemiye-Goboleedka AfSoomaaliga (AGA) ayaa magaalada Muqdisho ku qabatey munaasabad ku saabsan Xus iyo Xusuus loo samaynayay Wakiilkii Akadeemiyada AGA ee K/Galbeed Prof. Maxamed Cali Kalaay oo dhawaan ku geeriyooday magaalada Baydhabo!
Munaasabaddaasi oo ujeedadeedu aheyd sidii loogu duceyn lahaa marxuumka geeriyooday ayaa waxaa ka soo qeyb galay Agaasimaha Wakaaladda Wararka Qaranka ee (SONNA) iyo Wargeyska Dalka Cali C/qaadir Cali agaasimaha xiriirka dowlada Gobaleedyada ee Wasaaradad Warfaafinta Dhaqanka iyo Dalxiiska C/llaahi Xasan Cali,xubno ka socday wasaaradad waxbarashada DFS, Guddoonka Akadeemiye-Goboleedka, madaxda Golaha Abwaannada, wakiilo ka matalayay bahda afka, qoraalka iyo akhriska, xubno ka socday ehelada marxuumka iyo marti sharaf kale oo badan.
Furitaankii munaasabaddaasi ayaa ugu horeyntii waxaa ka hadlay Guddoomiyaha Akadeemiye-Goboleedka AfSoomaaliga Prof. Maxamed Daahir Afrax oo sheegay inuu guud ahaan ummadda Soomaaliyeed, gaar ahaan qoyskii iyo asaxaabtii uu ka baxay Wakiilkii AGA ee K/Galbeed uu uga tacsiyaynayo geeridi ku timid marxumkaasi, isaga oo caddeeya inuu Alle uga baryayo inuu Jannadiisa ka waraabiyo.
โProf. Kalaay waxa uu ahaa aqoonyahan qaali ah oo mudan in la xuso, maadaama uu wax badan u soo qabtay ummaddiisa, waxaana lagu xasuusan doonaa kaalintii uu ku lahaa daryeelka iyo hiilka afka hooyoโayuu yiri Prof Afrax oo iftiimiyay in shaqsi qiima badan uu ka baxay Akadeemiye-Goboleedka AfSoomaaliga.
Munaasabaddaasi waxaa lagu soo bandhiggay taariikh nololeedkii Prof. Maxamed Cali Kalaay, waxaana halkaasi ka soo jeediyay Prof. Mustafa C/llaahi Feyruus oo ka mid ah madaxda Akadeemiye-Goboleedka, isaga oo si cilmiyaysan u faah-faahiyay heerarkii kala duwanaa ee uu soo maray marxuumka.
Wasiirkii hore Wasaaradda Hawlaha Guud Eng. Saalax Sheikh Cusmaan, La-taliyaha Wasaaradda Waxbarashada Dr. Cabdi-shakuur Shiikh Xasan Fiqi, Guddoomiyaha Golaha Abawaannada Soomaaliyeed Abwaan Xisri Dhuux iyo Agaasimaha Wakalaadda Warrarka Soomaaliyeed iyo Wargayska Dalka ee Wasaaradda Warfaafinta Cali C/qaadir Aadan oo iyaguna halkaasi ka hadlay ayaa ka tacsiyeeyay geerida Prof. Kalaay, iyaga oo soo jeediyay in si wadajir ah loogu duceeyo marxuumkaasi.
Sidoo kale waxaa munaasabaddaasi ka hadlay Prof. Fawsi Cabdi-nuur Maxamed oo ka tirsan Golaha Aqoonayahannada Koonfurta Soomaaliya, Guddoomiyaha naadiga Hillin-hayaan C/qaadir Axmed Jubba iyo Cali Maxโed Kalaay oo ku hadlyay afka ehelada ayaa ka sheekeeyay qeybo ka mid ah taariikhdii marxuumka iyo doorkii uu ku lahaa bulshada Soomaaliyeed.
Prof. Maxamed Cali kalaay waxa uu sannadkii 1953 ku dhashay magaalada Baydhabo, waxaa uu soo noqday Wasiirkii Tacliinta Sare Dawladdii Carte, waxa uu ahaa aasaasihii Jaamcadda Koonfurta Soomaaliya, waxa uu ahaa Wakiilkii Akadeemiyada AGA ee K/Galbeed, noloshiisa inteeda badan waxa uu ku soo qaatey dhinacyada waxbarashada iyo daryeelka afka, dhaqanka iyo hal-abuurka Soomaaliyeed.
