Dhuusamareeb-(SONNA)-Wasiirka wasaaradda tamarta iyo biyaha dowlad goboleedka Galmudug, Maxamuud Cabdi Kaarshe ayaa degmada Gelllinsoor ka dhagax dhigay mashruuc leyrarka kushaqeeya cad-ceedda looga hirgelinayo magaalooyin ka tirsan Galmudug.
Mashruucan Soollarka oo ay hirgelintiisu gacan weyn ku leedahay dowladda Norwey ayaa laga fulin doonaa magaalooyinka Gelinsoor, Balanbal iyo Dhuusamareeb, iyadoo haatan loo qoondeeyay saddexdaas degmo 110 xabbo oo layrarka cadceedda ku shaqeeya ah, sida uu sheegay wasiirka wasaaradda tamarta iyo biyaha dowlad goboleedka Galmudug.
Muhiimadda degmooyinkan looga hirgelinayo mashruucan ayuu ku sheegay wasiirku ka qayb qaadashada amniga iyo dhiirri gelinta ganacsiga, isagoo ugu baaqay bulshada degaanka inay ilaashadaan hantidooda, kana shaqeeyaan horumarinta iyo bilicda degaanka.
Maamulka iyo wax garadka degmada Gellinsoor ayaa dowladda Galmudug ugu mahad celiyay mashruucan nalalka cadceedda ku shaqeya ee laga hirgeliyay halkaas.
