Muqdisho,(SONNNA):- Magaalada Mareeg ee bariga gobolka Galgaduud, waa magaalada kaliya ee gobolka Galgaduud ka tirsan kuna taala dhanka xeebta.
Mareeg, qof kasta magaceeda waa uu garanayaa, balse waxaa ku duugan arrimo xasaasi ah iyo xusuusuo murugo leh oo shacabka ku nool bariga gobolka Galgaduud ay la yaabeen.
Magaaaladan waxaa ku aasan caalamkii Soomaaliyeed ee caanka ahaa Sheekh Daa’uud Culusow Cubeyd, halkan ayaa la isugu imaan jiray siyaarta Sheekha, taas oo magaalada lagu qaban jiray.
Balse, intii maleeshiyaadka Al-shabaab ay joogeen bariga gobolka Galgaduud dhammaan dadka shacabka ah halkan waxay noqotay goob ay ka caaggan yihiin.
khawaarijta Al-shabaab ayaa shacabka u diiday, iyagoo sidoo kale, sheegay in magaaladan qof shacab ah tegi karin, taas oo shacabka ku nool bariga gobolka Galgaduud la noqotay mid la yaab iyo argagax ku abuurtay.
Magaaladan Mareeg, waxaa ku yaalo dhismo qadiimi ah, kuwaas oo ay dhiseen gumeystihii Soomaaliya soo maray, waxaa la tilmaamaa in magaaladan ay tahay mid aas-aasan muddo ka badan qarni, sidoo kale, magaaladan ayaa ahayd muddooyinkii ugu dambeeyay mid la deegaansan maaddaama Khawaarijtii joogtay bariga gobolka Galgaduud dadka ay u diideen.
Sidoo kale, magaalada Mareeg dadka si dhuumaaleysi ah ayay ku imaan jireen, iyadoo dadka ku nool degmada Ceeldheer qaarkood ay inoo sheegeen in dadkii deegaanka ee halkan sida dhuumaaleysiga ah ku imaan jiray qaarkood argagixisada lacago ku xukumeen.
Dadka Ceeldheer ku nool, halkan muddo sanado ah waa ay ka caaganaayeen,balse hadda maalin kasta oo jimco ah waa loo soo dalxiis tagaa oo kumanaan shacab ah oo ku nool magaalada iyo ciidamada Militariga ayaa halkan u soo damaashaad tego.
Al-shabaabkii halkan ku sugnaa oo bariga gobolka Galgaduud maamuli jiray hadda waa ay ka firxadeen oo kaa dadka shacabka ah iyo ciidanada xoogga Dalka ku damaashaadaya.
Sidoo kale, magaalladan waxaa lagu tilmaamaa meelihii Al-shabaab kala soo degi jireen hubka iyo saanadda kale ee ciidan oo ay shacabka Soomaaliyeed ku gumaadi jireen, balse hadda sheekadaas waa la soo afjaray.
Shacabka deegaanka ayaa soo dhoweeyay tallaabada ciidamada xoogga Dalka Al-shabaab kaga fara-maroojiyeen degmadaas oo jiritaankooda muhiim u ahayd, waxayna balan qaadeen si aanay Khawaarijta u soo noqon in ay ciidamadu garab istaagayaan kalana shaqeynayaan amniga deegaanka iyo guud ahaan gobolka.
