Muqdisho (SONNA)-Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo kumanaan shacab ah kala qeyb-galay banaanbaxa Kacdoonka Muqdisho iyo Dabar-goynta Khawaarijta ee ka dhacay garoonka Eng. Yariisow ayaa jeediyey Khudbad dhinacyo badan taabaneyso oo ay ka mid tahay dagaalka lagula jiro argagixisada & guulaha laga gaaray.
Madaxweyne Xasan Sheekh ayaa sheegay in Khawaarijta ay yihiin Kalluun biyahii ka dhamaaday oo ay marayaan heer gabo-gabo ah, isaggoo ugu baaqay dadka ku nool gobolka Banaadir inay ka qeyb qaataan dagaalka lagu ciribtiriyo Argagixisada, ayna kasoo saaraan guryahooda.
” Dadka gobalka Banaadir ku nooloow Khawaarijta dharkiina ka hurgufta, kasoo saara guriyihiina, si dhexdiina aysan ugu dhuuman, Waa Kalluun biyahii ay ka gureen, Kalluuna haddii ay biyaha ka guraan waa dhimasho, way dhinteen Al Shabaab. ”
ayuu yiri Madaxweynaha JFS.
Sidoo kale Madaxweynaha Jamhuuriyadda Federaalka Soomaaliya Mudane Xasan Sheekh ayaa xusay in dowladda Soomaaliya ay soo bandhigi doonto Akoono iyo xisaabaad lacagaha loogu kala diri jiray Khawaarijta, islamarkaana lala xisaabtami doono Bankiyo ku leh arrintaasi, talaabana laga qaadi doono.
” Dowladda Soomaaliya waxay soo bandhigi doontaa Akoono iyo xisaabaad lacagaha loogu kala diri jiray Khawaarijta, bangiyo badan oo ku lug lehna dowladdu way la xisaabtameysaa, tallaabo ayeyna ka qaadi doontaa. ” ayuu yiri Madaxweyne Xasan Sheekh.
