Wargaadhi (SONNA): Madaxweynaha Hirshabeelle, Mudane Cali Cabdullaahi Xuseen (Cali Guudlaawe), ayaa kormeer ku tagay deegaanka War-gaadhi ee gobolka Shabeellaha dhexe si uu u dhiirrigeliyo ciidamada qalabka sida iyo xaq-u-dirirka deegaanka ee la dagaallamaya Khawaarijta.
Madaxweynaha ayaa kulammo la yeeshay saraakiisha hoggaamineysa howlgalka, isagoo ammaanay geesiyaasha ku sugan furimaha iyo guulaha laga gaaray dagaalka oo maalmihii lasoo dhaafay lagu jabiyay khawaarijta.
Madaxweyne Cali Guudlaawe ayaa xusay in gulufka mideysan ee ka socda Hirshabeelle lagu soo afjaraayo Khawaarijta nafla caariga ah isagoona shacabka ugu baaqay midnimo iyo niyad-wanaag, Madaxweynaha ayaa sidoo kole tacsi u diray qoysaska geesiyaasha naftooda u huray halganka ka dhanka ah Khawaarijta ee ka socda Hirshabeelle.
