Jowhar-(SONNA)-Madaxweynaha maamul goboleedka Hirshabeelle Mudane Cali Cabdullaahi Xuseen (Cali Guudlaawe) ayaa si rasmi ah xariga uga jaray mashruuca SCRP oo dhismooyin kala duwan kusoo kordhiyey Hirshabeelle.
Wasaaraddaha Qorsheynta, Caafimaadka iyo Howlaha Guud oo kaashanayo Wasaaradda Maaliyadda Dowladda Soomaaliya iyo Bangiga Adduunka ayaa wadajir u hirgeliyey mashruuca kasoo kabsashada xasaraddaha Soomaaliya (SCRP) kaas oo ka kooban xarumo caafimaad, waddooyin, caro-tuur webiga iyo kanaallo laga hirgeliyay Hirshabeelle.
Munaasabadda daah-furka ayaa ka dhacday xarun caafimaad oo si casri ah loo dhisay taas oo laga horgeliyey xaafadda Kulmis ee magaaada Jowhar.
“Xarumaha caafimaad iyo waddooyinka lagu dhisay mashruuca (SCRP) waxay waxtar u leeyihiin bulshada gaar ahaan Hooyadda iyo Dhallaanka oo u baahan daryeel gaar ah.” Furitaanka munaasabadda waxaa haddalkan ka yiri Madaxweynaha dowlad goboleedka Hirshabeelle.
Ugu dambeyn Madaxweynaha Hirshabeelle ayaa uga mahadceliyey Bangiga Adduunka taageerada Soomaaliya.
