London(SONNA)-Tababaraha kooxda kubadda cagta Chelsea ee Frank Lampard ayaa ka hadlay kulanka ay caawa naadiga Manchester United ku wada ciyaari doonaan koobka Carabao Cup.
Kooxda kubadda cagta ee Chelsea ayaa caawa garoonkeeda Stamford Bridge ku soo dhoweynaysa naadiga Manchester United kulan ka tirsan wareegga afaraad ee koobka Carabao Cup.
Si kastaba ha noqotee, Frank Lampard ayaa kahor kulanka la wada sugayo ee caawa wuxuu ka hadlay guuldaradii 4-0 aheyd ee ka soo gaartay Manchester United kulankooda furitaanka horyaalka Premier League ee xilli ciyaareedkan.
Frank Lampard ayaa wuxuu sida caadiga ah ka soo muuqday shir jaraa’id kahor kulanka caawa si uu kaga hadlo dhowr arrimood ee quseeya kooxdiisa Chelsea wuxuuna yiri:
“Chelsea waa ay soo fiicnaaneysaa waana waxa ugu muhimsan oo aan raadineynay tan iyo bilowga kulamadii isku diyaarinta ee xilli ciyaareedka”.
“Tan iyo xirfadeyda ciyaareed ee kubadda cagta ciyaaryahan ahaan, waxaan adeegsan jiray inaan dhageysanin waxyaabo badan ee ku saabsan mustaqbalka, haddii aan sidaas sameyno, waxaan la kulmi doonnaa dhibaatooyin”.
Yeelkeede, Frank Lampard ayaa wuxuu intaas kaddib ka hadlay guuldaradii 4-0 aheyd ee ka soo gaartay Manchester United bilawgii xilli ciyaareedkan wuxuuna yiri:
“Waa ciyaar waqtigeeda uu dhamaaday, kama hadli doono arinkaas, laakiin marka aad la ciyaareyso Manchester United waad xanuunsan doontaa, waxay naga dhaliyeen afar gool inkastoo qaab ciyaareedkeena uu fiicnaa”.
“Kulanka soo aadan waxaan arki doonaa ciyaartoy aan ciyaarin, waxaan sameyn doonaa isbadal, sababtoo ah xiddigaha keydka waxay go’aamiyeen kulamo sida Newcastle United iyo Ajax, N’Golo Kanté iyo Antonio Rüdiger wali diyaar uma ahan inay ciyaaraan kulankan”.
