Muqdisho (SONNA)-Wasaaradda Caafimaadka XFS Ayaa Muqdisho ku qabatay kulan lagu xusayey Todobaadka wacyigelinta iyo ka hortagga si qaldan u isticmaalka daawooyinka Jeermis dilayaasha
Iyadoo 18- ilaa iyo 24 November ee sanad walba dunida oo dhan laga Xuso Todobaadka wacyigelinta iyo ka hortagga si qaldan u isticmaalka daawooyinka Jeermis dilayaasha ah ayeey Wasaaradda Caafimaadka Soomaaliya oo kaashaneysa WHO waxey qabatay kulan Bulshada looga wacyigalinayo qataraha caafimaad ee lagala kulmi karo si qaldan u isticmaalka daawooyinka Jeermis dilayaasha Taas oo sababi horseedi karta In jeermisku adkeysi u yeesho daawooyinka jeermis-dilaha ah.
Madasha oo lagu soo bandhigay Cilmibaarisyo iyo doodo ay ka qeyb galeyn dhaqaatiir iyo Xeeldheerayaal caafimaad ayaa la isla qaatay In ay waajib tahay In bulshada laga wacyigeliyo dhibaatada laga dhaxli karo in si qaldan loo isticmaalo daawooyinka jeermis dilayaasha ah oo sababi kara Qataro caafimaad.
Agaasimaha Guud ee Wasaaradda Caafimaadka Soomaaliya Dr Cabdinaasir Mukhtaar Ibraahim oo kulanka soo xiray Ayaa xusay inay Ka wasaarad ahaan diyaariyeyn qorshooyin iyo sharciyo quseeya arimaha daawooyinka, islamarkaana marka la meermariyo ay wasaaraddu awood u yeelan doonto inay xadido oo ay koontaroosho tayada caafimaad ee daawooyinka dalka la keeno.
Munaasabada xuska todobaadka wacyigelinta ka hortagga si qaldan u isticmaalka antibaayootikada oo socon doonto muddo hal todobaad ah ayeey wasaaradda caafimaadka Soomaaliya sanadkan ugu talo gashay barnaamijyo wacyigelin ah oo laga sameyn doono qaar kamida isbitaalada dalka, si bulshada loo tusaaleeyo qataraha ku xeen-daaban si qaldan u isticmaalka daawooyinka Jeermis dilayaasha ah.
