Muqdisho-(SONNA)-Waxaa maanta magaalada Muqdisho ka qabsoomay kulan muhiim ah oo u dhexeeyay Hay’adda Socdaalka iyo Jinsiyadda Soomaaliyeed iyo Hay’adda Aqoonsiga iyo Diiwaangelinta Qaranka (NIRA) kaas oo looga hadlayay is-waafajinta adeegyada labada hay’adood iyo qorsheyaasha la xiriira adeegsiga Kaarka Aqoonsiga Qaranka.
Kulanka oo uu shir guddoomiyay Wasiirka Amniga Gudaha, Cabdullaahi Sheekh Ismaaciil (Fartaag), waxaa qeyb ka ahaa:
* Wasiiru-Dowlaha Wasaaradda Arrimaha Dibadda, Cali Maxamed Cumar (Cali Balcad)
* Maareeyaha Hay’adda Aqoonsiga Qaranka (NIRA), Cabdiwali Cali Cabdulle (Tima-cadde)
* Agaasimaha Guud ee Hay’adda Socdaalka iyo Jinsiyadda, Mustaf Dhuxuloow
* Howlwadeeno ka kala socday labada hay’adood
Ujeeddooyinka ugu waaweyn ee kulanka waxaa ka mid ahaa:
* Hirgelinta isticmaalka Kaarka Aqoonsiga Qaranka ee qaadashada baasaboorka
* Dardargelinta aqoonsiga caalamiga ah ee Baasaboorka Soomaaliga
* Sugidda iyo tayeynta xogta muwaadiniinta Soomaaliyeed
* Xoojinta is-dhexgalka nidaamyada xog-wadaagga ee HSJ iyo NIRA
* Dhisidda hannaan joogto ah oo ay si wadajir ah u fuliyaan labada hay’adood.
Intii uu socday kulanka, waxaa laysla meel dhigay in laga bilaabo 1-da Sebteembar 2025, dadka qaadanaya Baasaboorka Soomaaliya in laga rabo in ay haystaan Kaarka Aqoonsiga Qaranka, si loo xaqiijiyo sugnaanta iyo kalsoonida xogta muwaadinka.
Sidoo kale, waxaa la go’aamiyay in laga bilaabo 1-da Janaayo 2026, dhammaan socdaalka gudaha dalka lagu xiro isticmaalka Kaarka Aqoonsiga Qaranka, si loo hubiyo xogta shakhsiga ah ee muwaadiniinta.
Labada Hay’adood ayaa muddooyinkii u dambeeyay si wadajir ah uga shaqeynayay is-waafajinta adeegyada dowliga ah ee ay siiyaan dadweynaha, si muwaadiniinta loogu sahlo helitaanka xaquuqdooda dastuuriga ah.
Tallaabooyinkan ayaa qeyb ka ah dadaallada lagu mideynayo xogaha muwaadiniinta, laguna adkeynayo dhawrista xogta, ammaanka, iyo hufnaanta adeegyada dowladda.
