Muqdisho(SONNA)- Kulamo ka tirsan horyaalka Somali Premier League ayaa galabta ka kala dhici doona garoomada Jaamacadaha iyo Eng Yariisow Stadium.
Kulamadan ayaa ah mid aad u xiiso badan waxaana is arku doona kooxaha kala ah Elman fc Vs Heegan iyo Mogdisho City Club Vs Rajo fc.
Garoonka Eng Yariisow ayaa galabta marti soori doona kulanka ugu xiisaha badan kaas oo dhaxmari doona kooxaha Heegan fc iyo Elman, waana kulankii ugu horeyay ee kal ciyaareedkan ay ciyaari doonan.
Kooxaha ayaa diyaar garow xoogan u galay tartanka Horyaalka iyagoo midba midka kale uu rabo inuu guul ku furto kulankiisa ugu horeya horyaalka.
Labadii Kulan ee ugu dambeyay ay labadan kooxod Elman iyo Heegan isku arkan horyaalkii la soo dhaafay waxaa adkaatay kooxda Elman waxeyna ugu adkaatay 2-1 iyo 3-1, taas oo kuu muujineysa iney ka itaal roontay kooxda jaalayaasha ee Elman.
Ciyaaryahan Bile Muxudiin Buraale ayaa galabta ka hor imaan doona kooxdiise hore ee Heegan isago iminka matalaya naadiga Elman.
Naadiga Elman sanad ciyaareedkii la soo dhaafay waxey ku dhameysatay Kala sareynta kaalinta 3-aad halka Kooxda Ciidanka Booliska Soomaaliyeed ee Heegan iyadan ay baaqi ku noqotay booska 4-aad ee kala sareynta horyaalka.
Tababare Mahad Meykon ayaa galabta hogaamin doona kulankiisa ugu horeyay horyaalka kooxda kubadda cagta ee Heegan.
Ogeysiis Kulanka:
Tartanka: Somali Premier League
Kooxaha: Elman Fc Vs Heegan fc
Garoonka: Eng Yariisow Stadium
Saacada: 3:30
Dhanka kale Garoonka Jaamacadaha ayaa waxaa ku dagaalami doona kooxaha kala ah Mogdisho City Club iyo Rajo.
Ciyaartan ayaa ah mid aad u xiiso badan maadama kooxda Rajo Fc oo sanadkii la soo dhaafay ka soo dalacday horyaalka heerka labaad ay kulankeeda ugu horeyay horyaalka fasal ciyaareedkan wajihi doonto kooxda faca weyn ee Mogdisho City Club.
Ogeysiis Kulanka:
Tartanka: Somali Premier League
Kooxaha: Mogdisho City Club Vs Rajo Fc
Garoonka: Jaamacadaha Stadium
Saacada: 3:30.
