Muqdisho.( SONNA):- Inaad sugtaa nabad aadan qeyb ka ahayn, waa adigoo dhahay meel mugdi ah ayaa ifeysa, carruurtaada oo baari kuu noqotaana waxaa ka horeysa in marka hore awlaadaada aad u muujiso naxariis iyo kalsooni ay ku noolaadaan.
Araartaas waxaan u soo qaatay, dalkeennu muddo wuxuu ku jiray ammaan-dari oo ay wada dareemeen madax iyo shacab, taas oo ka dhalatay Dowlad bur burkii nagu dhacay oo ugu dambeyntii sabab u noqotay in dalkeennu hooy u noqdo argagixiso aan arxan lahayn.
Si aan uga baxno ammaan-xumida Dowladihii kala dambeeyay, dalka waxay u dhiseen ciidamo loogu talagalay soo celinta nabadda iyo la dagaallanka argagixisada.
Ciidamada iyo saraakiishu waxay u baahnaayeen gacantii wehelin lahayd oo ah shacabka si meesha looga saaro xasillooni-darida jirtay, nabad imaataa gacantaada kaagama horeysee, shacabkii ayaa kacay iyagoo bannaanka u yimid in ay u bareeraan argagixisada oo ay ka noolaan waayeen.
Bile Kaaraan, waa wiil dhalinyaro ah, waxa uu sabab u noqday dhagar-qabayaal markii la qabanayay gacmaha dhiig qoyan ku lahaa reer Muqdishana dhibay.
” Waxaa suuuqa Kaaraan lagu dilay askari ka tirsan ciidanka, aniga waa fiirinayay, waxaa damiirka isiinwaayay in aan ka haro nimanka oo sii socdo, waa daba kacay, taliye ku-xigeenka saldhiga Kaaraan ayaa taleefoonka qabad siiyay, markaas isaga goobta ma joogin wuxuu ii xiriiriyay taliyaha saldhiga Salaad Caraale ayaa markaas hayay, ka daba caraabid ka dib waxaan ku qabanay waddada xiriirisa Jamhuuriya iyo Kaaraan,” ayuu yiri Bile Kaaraan.
Ammaanka raaxo iyo jiif midna Kuma yimaadee, Qoys dhan ayaa naftooda u huray nolosha askar qeyb ka ah in ay nabad ku noolaadaan shacabka caasimadda ku sugan.
” anigoo gurigeyga iyo ilmaheyga iska dhex fadhiya ayaa la igu soo galay, iyadoo ujeedka yahay in la dhibaateeyo ciidan heegan u ah u sugidda amniga, waxaan go’aan ku qaatay in ciidankaas waxba aysan gaarin oo aniga iyo ilmaheyga isku dhigno oo dhaawacaas nagu soo gaaray, walaasheyna ay ku dhimato,” ayuu tiri Hooyo geesiyad ah oo dhibane u ah dhagar-qabayaasha Khawaarijta ah.
Hadda waxaa la helay xannuun muddo hayay shacabka iyo Dowladda, qaabkee ayaa loo daweyn karaa?.
” Marka waxaan garanay oo farta ku fiiqnay, meesha ina xannuuneysa iyo dawadaa u baahan nahay, amni-daraa Ina haysa, amni beynu u baahanay, amni si aan u helno waxaan u baahan nahay inaan nafteenna hurno,” ayuu yiri RW Xamsa.
Duqa magaalada Muqdusho, wuxuu qirayaa sida shacabka caasimadda ku nool ay gacanta u saareen cadowga nabaddooda caqabada ku ah.
” Shacabka magaalada Muqdisho, gacmahooda ayay amniga wax uga sugeen, khawaarijta iyo kooxdii la dhihi jiray Garan-waaga,ayagaa soo qabtay qaarkood, qaarkood dagaal ayay ku galeen, waxaanna ugu dambeeyay kuwii maanta miinada isugula qarxin rabay Beerta Nabadda kuwii soo sheegaa shacabka ka mid ah,”.
Warbaahinta Qaranka ayaa door weyn ka qaadatay la dagaallanka argagixisada iyo in caasimadda ay noqoto mid ammaan ah, waxayna madaxda qaranku qireen doorka aan la qarin karin ee shacabka Soomaaliyeed ka qaateen in la wiiqo awoodii kooxda Khawaarijta Al-shabaab.
