Ciidamada Xoogga Dalka iyo geesiyaasha deegaanka oo xog dhameystiran ka hayay isku day cadowga khawaarijta ah ay ku soo weerarayaan degmada Ceeldheer ee gobolka Galgaduud ayaa u degay qorshe difaac oo lagu burburiyay kooxdii naf la caariga ahayd ee weerarka gaadmada ah soo qaaday, iyadoo Dagaalka koowaad uu ka dhacay banaanka magaalada oo marka hore ay isku fara saareen ciidan loo diyaariyay maleeshiyadii la soo khaldey, waxaana halkaas lagu dilay ilaa 9 xubnood oo ka tirsan Khawaarijta.
Dhagarqabayaashii oo ku jabay goobta dagaalka ayaa dib uga baxsaday magaalada, iyaga oo u kala firxaday qeyba kala duwan. Geesiyaasha deegaanka iyo ciidanka Qaranka oo dabin u diyaariyay ayaa ku helay tuulo u dhaxaysa deegaanka Cali Yabaal iyo xarunta Degmada, waxaana halkaas ay ku dileen ilaa 18 ka tirsanaa maleeshiyaadkii habqanka ahaa ee ku soo jabay dagaalkii Ceeldheer, waxaana ay ka qabsadeen Gaadiid iyo Saanad kale. Sidoo kale, intii ka hartay Khawaarijta waxaa duqeyn dhinaca cirka ah lagula beegsaday deegaanka Cali Yabaal, waxaana xogtii markaa oo horudhaca aheyd ee laga helay ay sheegaysaa in lagu laayay in ka badan 20 Khawaarij ah oo isugu jiray maleeshiyaad iyo horjoogayaal.
Meydadka Khawaarijta ayaa wali daadsan goobihii ay ka dhaceen dagaaladii ay ku hoobteen cadowga, waxaana wadarta guud ee khasaaraha horudhaca ah uu muujinayaa in 47 xubnood laga dilay cadowga,. Ciidanka Qaranka iyo geesiyaasha deegaanka ee cashirka lama ilaawaanka ah u dhigay Khawaarijta, waxaana dagaalkaasi ku shahiiday 5 xubnood oo naftooda u huray baabi’inta cadowga ku soo gardarooday dadkooda iyo dalkooda.
Ciidanka Xoogga Dalka ayaa weli ku dabajooga maleeshiyaadkii cararey oo qaarkood ay dhaawacan yihiin, waxaana lagu soo waramayaa in Keymaha howdka ah wali laga soo helaayo Meydad iyo kuwa dhaawac ah, Ciidanka xoogga dalka iyo geesiyaasha deegaanka oo labadii maalin ee la soo dhaafay ku hawlanaa baadi goobka haraadigia Khawaarijtii lagu laayay dagaalkii ay ku jabeen ee ka dhacay degmada Ceeldheer ee gobolka Galgaduud ayaa helay meydadka ilaa 10 xubnood oo ka tirsanaa Khawaarijtii soo weerarta magaalada waaberigii sabtidii tagtay, sida lagu sheegay war-saxaafadeed ka soo baxay wasaaradda warfaafinta dowladda FS.
Ciidamada ayaa sidoo kale gacanta ku dhigay tiro maleeshiyaad intii lagu jiray baadigoobka iyo sifeynta Khawaarijta dagaalkii Ceeldheer kadib, iyadoo Ciidamada Dowladda ay ku howlan yihiin Aasidda Meydadka la helay, waxaa sidookale ay sii wadaan howlgalka uruurinta maadaama ay jiraan maleeshiyaad kale oo dhaawac ahaa oo daryeel xumo qaarkood u dhintay, wadarta guud ee maleeshiyaadka la dilay ayaa ilaa hadda kor u dhaafay 60 xubnood oo ay Horjoogayaal ku jiraan.
Dowladda Soomaaliya waxa ay ugu baaqaysa Waalidiinta Soomaaliyeed ee ay caruurtoodu qaldeen cadowga Khawaarijta ah in ay kala soo baxaan, Dowladdana waxaa ka go’an cirirbtirka Khawaarijta, dhalinyarada ay qaldeen waxa ugu yeeraynaa in ay si deg deg ah uga soo baxaan nabad diidka arxanka darran, inta aysan ku bixin gacanta Ciidanka Qaranka iyo geesiyaasha deegaanka si la mid ah kuwii la midka ahaa ee alle ku ciqaabay gacanta ciidamadeena.
Taliyaha lugta Ciidamada Xoogga Dalka General Dayax Cabdi Cabdulle ayaa gaaray Magaalada Ceeldheer ee Gobolka Galgaduud, Taliyaha oo Kormeeray goobahii lagu jebiyay Khawaariijta iyo gudaha Magaalada ayaa Ciidamada Xoogga Dalka iyo kuwa dib u xoreeynta deeganka ku ammaanay geesinamada iyo naftahurida.
Ra’iisul Wasaaraha Xukuumadda Federaalka Soomaaliya, Xamsa Cabdi Barre, ayaa sheegay in dowladda Soomaaliyeed ay mideynayso dhammaan tababarrada kala duwan ee ciidanka qalabka sida, ee ay inaga caawiyaan dowladaha saaxiibka la ah Soomaaliya, Ra’iisul Wasaaraha ayaa hadalkan ka sheegay mar uu shalay booqasho ugu tagay Ciidanka Soomaaliyeed ee ku jira kuliyadda tababarka TurkSom, waxaana uu intaa raaciyay in ciidanka qalabka sida loo dajinayo hal manhaj oo mideysan taasi oo xoojineysa gudashada waajibaadkooda.
Ra’iisul Wasaaraha ayaa saraakiisha iyo ciidanka kula dardaarmay inay yihiin rajada dalka iyo dadka Soomaaliyeed ay leeyihiin, isla markaana ay u diyaargaroobaan ciribtirka Khawaarijta iyo xoreynta dalka, wuxuuna intaasi raaciyay in dowladdu abuureyso hey’ad u xilsaaran daryeelka agoonta ciidamada Qalabka sida, isla markaana ‘Maalin Qaran’ loo asteyn doono sanad walba maalinta shuhadada, wuxuuna uga mahadceliyay dowladda Turkiga, oo si weyn u xoojisay taageerada isugu jirta Qalabeynta iyo Tayeynta ciidankeena, gaar ahaan dhinaca Caafimaadka Militeriga iyo gargaarka xaaladaha degdegga ah.
Dhinaca kale Madaxweynaha Dowladda Federaalka ah ee Soomaaliya Xasan Sheekh Maxmuud ayaa xalay dalka Norway kula hadlay jaaliyadda Soomaalida ee ku dhaaqan halkaasi, isaga oo warbixin ka siiyay xaaladda Soomaaliya, gaar ahaan dagaalka Al Shabab, dowlad-dhiska iyo horumarinta kaabayaasha dhaqaalaha, islamarkaana ay ku soo taageerayaan wax qabadka dowladda iyo qorshaha cirib-tirka khawaarijta.
Madaxweyne Dr: Xasan Shiikh ayaa ku dheeraaday ka hadalka dowladihii la soo maray iyo halka ay maanta joogto, wuxuuna ballaanqaaday inay dowladdiisu dhameystiri doonto Dastuurka, islamarkaana la qabto doorasho Hal Qof iyo Hal Cod, waxaa kaloo uu soo hadal qaaday Xubinnimaddii ay dhawaan Soomaaliya ka mid noqotay Golaha Ammaanka ee Qaramada Midoobay iyo dib u soo nooleyta golayaasha kale ee heer Gobol iyo heer Caalami, waxaa kaloo uu Jaaliyaddsa Soomaalida ee Norway u sheegay in mutaqbalka Soomaaliya uu wanaagsan yahay.
“ Booskii aan dunida ku laheyn oo aan xaqiijinno 54 sano ka hor ayaa noogu dambeysay inaan fadhiisanno Kursiga Golaha Ammaanka, Kursigeena ayaa WaddamadaDersika ay Boorsooyinka saran jireen marka shirarka la yimaado Alxamdullilaah maanta waa fadhinaa waa nimid”, sidaasi waxaa yiri Madaxweyne Xasan Shiikh Maxamuud.
Madaxweynaha ayaa aad ugu dheeraaday ka hadalka dagaalka lagula jiro Kooxda Khawaarjta ah ee Alshabaab, wuxuuna sheegay in 17 sano kadib in Shacabka Soomaaliyeed ku baarugeen, islamarkaana qaatay inay la dagaalamaan, kadib markii ay ogaadeen inaysan jirin meel Diin ahaan iyo Qiyam ahaan melena kaga jirin diinta Islaamka, lana dagaalami karo, taasi oo ay horey u ceddeeyeen Culimada Soomaaliyeed, iyagoo ku caddeyay inay yihiin Khawaarijta cusub. “ Khawaarijtu muddo ka badan 16 sano ayay Dalkaan joogeen, iyadoo dhibaato ba’an ku haya shacabka Soomaaliyeed, kadib ayaan go’aansanay in aan ka bilowno la dagaalankooda”.
Madaxweynaha Jamhuuriyadda Federaalka Soomaaliya,Dr: Xasan Sheekh Maxamuud ayaa sheegay in dagaalka lagula jira khawaarijta uu meel fiican marayo, isagoo ugu mahad celiyay shacabkii ka dhiidhiyay dhibaatada nabad-diidka, wuxuuna sheegay in sida ugu dhaqsiyaha badan loo soo afjari doono kooxaha Argagixisada.
