Muqdisho.(SONNNA):- Wararka ay warbaahinta qaranka ka heshay deegaannada iyo degmooyinka bariga gobolka Galguduud ayaa xaqiijinaya in ay fashil ku dhammaadeen laguna kala tegay wada-hadallo xoog ahaa oo ay horjoogayaasha kooxda Khawaarijta Al-shabaab la yeesheen odayaasha dhaqanka deegaannada bariga gobolka Galguduud ee maamulka Galmudug.
Shirarkan lagu kala tegay, kullankii ugu dambeeyay wuxuu gelinkii dambe ee talaadadii ka dhacay degmada Ceelbuur, wuxuuna u dhaxeeyay odayaal ku wada abtirsada degmooyinka Ceelbuur iyo Galhareeri iyo horjoogayaal ku heyb ah oo hal beel ka soo wada jeeda, waxayna horjoogayaasha ku guuldareysteen in horjoogayaasha ku qanciyaan in beel ahaan iyagoo u abaabulan ay ka dhinac dagaallamaan maleeshiyaadka Khawaarijta Al-shabaab oo dhowr iyo tobankii sanno ee la soo dhaafay deegaannadaas gumeysiga ku heystay.
Horjoogayaasha ayaa odayaasha dhaqan waxay hor-dhigeen labo arrimood oo midd ugu horeyso ay tahay in ay keennaa dhallinyaro magaca qabiilka ku socota oo u dagaallanta Al-shabaab iyo odayaashu qudhooda in ay dagaalka ka qeyb galaan iyo qodobka labaad ah oo ah in odayaasha dhaqanka dadka ay matelaan ee da’da ah ee ka soo jeeda Ceelbuur iyo Galhareeri laga soo uruuriyo lacago baad ah, maaddaama Khawaarijta Al-shabaab muddooyinkii ugu dambeeyay ay soo food-saartay dhaqaalo-daro aad u xooggan.
Catowga iyo beer-laxowsiga horjoogayaasha Al-shabaab ayaa ahaa in odayaasha ay ku qasban yihiin in ay deegaannadooda difaacdaan, maaddaana Khawaarijta u muuqdaan in aysan u babac dhigi karin cududda ciidan ee ku soo wajahan.
Warar lagu kalsoon yahay oo warbaahinta qaranka ay ka heshay Ceelbuur ayaa sheegaya in odayaasha dhaqanka reer Galhareeri ee kullanka ka qeyb galay ay ugu nasteexeeyeen horjoogayaasha Khawaarijta ee ku heybta ah in ay deegaanka isaga cararaan, maaddaama aysan heyn awood ay uga hortagaan gulufka ciidan ee ku soo wajahan, taas oo keentay in horjoogayasha qaarkood aad uga caroodaan, islamarkaana u hanjabaan odayaasha dhaqanka.
Gelinkii dambe ee habeenimada talaadada iyo subaxii arbacada, waxaa Ceelbuur ka huleelay horjoogayaasha Al-shabaab, iyagoo aan la ogeyn halka ay aadeen, waxaase la xaqiijiyay in ay naftooda kala baxsadeen deegaannadaas.
Labo toddobaad ka hor ayay ahayd markii ay sidan oo kale ukala boodeen odayaasha dhaqanka bariga gobolka Galgaduud qaarkood iyo horjoogayaasha ku heybta ah ee ka soo jeeda Ceelbuur, Ceelgaras, Xiindheere iyo Garable. Wallow markaas ka dib la xir xiray qaar ka mid ah odayaasha dhaqanka uuna soo xiray horjooge Macallin Salaad Gabeyre oo ka soo jeeda isla Xiindheere.
Waxaa muuqata in markan uu soo gaba-gaboobayo joogitaan ku dhisnaa cabsi iyo gumaad shacab oo inta badan toban sanno maleeshiyada kooxda Khawaarijta Al-shabaab ku hayeen dadka ku dhaqan deegaannada bariga gobolka Galgaduud, iyadoo cabsi soo food-saartay horjoogayaasha Khawaarijtu keentay in ay inta badan isaga cararaan deegaannadaas.
