Muqdisho, (SONNA): Xulka kubadda cagta ee degmada Kaaraan ayaa galabta ku guuleystay koobka tartanka kubadda cagta ee degmooyinka Gobolka Banaadir iyo degmada Balcad, kadib markii ay ciyaarta kama dambaysta 2-0 kaga adkaadeen xulka degmada Gubadleey.
Ciyaartan adag oo ka dhacday garoonka Eng Yariisow Stadium, ayaa waxaa goobjoog ka ahaa taageerayaal fara badan iyo mas’uuliyiin ka tirsan dowladda federaalka iyo maamulka gobolka Banaadir.
Kaaraan ayaa qeybta hore ee ciyaarta ku hogaamisay labo gool, taasoo ay ugu dambeyn ku xaqiijisteen guusha.
Xulka Gubadleey oo difaac adag ku caan baxay sanadkan, ayaa u adkeysan waayay weerarka xooggan ee Kaaraan, oo sanadka si gaar ah u muujiyay awooddooda ciyaareed.
Kulankan ayaa soo gebogeboobay iyadoo xulka Kaaraan uu si rasmi ah ugu dabaaldegayo hanashada koobka.
