Muqdisho (SONNA)-Dalalka Jabuuti iyo Kenya ayaa mar kale sheegay in ay ka taageerayaan dowladda Federaalka Soomaaliya dagaalka ay kula jirto kooxda Khawaarijta ah ee Al Shabaab.
Madaxweynaha Jamhuuriyadda Jabuuti mudane, Ismaaciil Cumar Geelle oo shalay ka hadlay munaasabadda xarig jarka looga xarunta cusub ee Akadeemiye-Goboleedka Af- Soomaaliga ee Geeska Afrika ayaa sheegay in dowladdiisa iyo shacabkeedu ay garab taagan yihiin dowladda Soomaaliya, isagoo sheegay inay taageerayaan qorshaha Madaxweyne Xasan uu ku doonayo in Khawaarijta laga guuleysto.
Mudane Ismaaciil Cumar Geelle ayaa sheegay in natiijooyinka wanaagsan ee rajo-gelinta leh ee ka soo baxay duullaanka socda ay siinayaan Gobolka Geeska Afrika rejada dib u soo cusboonaatay ee ah in uu ka xoroobo argagixisanimada isla markaana lasoo afjaro daadinta dhiiga shacabka aan waxba galabsan.
Dhanka kale Wasiirka Gaashaandhigga Kenya Mudane, Aadan Barre Ducaale oo isna waxa uu sheegay in Kenya ay si buuxda u garab taagan tahay Soomaaliya, waxaana uu xusay inay ka qeyb qaadanayaan ciribtirka Khawaarijta, maadaama tallaabadaasi aysan faa’iido u laheyn Soomaaliya oo kaliya, balse ay tahay mid faa’iido u leh guud ahaan gobolka Geeska Afrika.
Mudane Aadan Barre Ducaale ayaa intaasi ku daray, in Madaxweyne William Ruto uu taageerro buuxda la garab taagan yahay walaalkii Madaxweynaha Soomaaliya Xasan Sheekh Maxamuud oo ku guda jira duullaanka Milliteri ee ka dhanka ah Argagaxisada, waxa uuna u gudbiyay rajjo wanaagsan oo ku aadan in labada dal iyo guud ahaan Gobolka ay u istaagaan horumarka iyo horumarinta nolosha muwaadiniinta.
Jabuuti iyo Kenya ayaa labaduba Soomaaliya ka joogaan ciidammo ka tirsan kuwa nabad ilaalinta Midowga Afrika, kuwaas oo qeyb weyn ka qaata caawinta ciidamada Soomaaliya ee dagaalka kula jira Khawaarijta Al Shabaab.
