Addis Ababa-(SONNA)-Dawladda Federaalka dalka Itoobiya ayaa xabsiga dhigtay weriye u dhashay dalka Faransiiska oo booqasho ku tagay dalkaas.
Antoine Galindo oo ah suxufi u shaqeeya shabakadda wararka ee Africa Intelligence oo loo soo gaabiyo (AI) ee fadhigeedu yahay magaalada Paris ee dalka France ayaa waxaa xiray ciidamo dhar cad ah maalinimadii khamiista isaga oo ku sugan Hotelka Ethiopian Skylight, sida uu sheegay gudiga difaaca saxafiyiinta ee CPJ.
Xiligaasi, wariyaha faransiiska Antoine Galindo waxa uu waraysi la yeeshay Bate Urgessa oo ah afhayeenka jabhadda Oromada ee loosoo gaabiyo (OLF), afhayeenka ayaa sidoo kale la xiray.
Suxufigaan ayaa lagu eedeeyay in uu qeyb ka yahay shirqool lagu doonayay in qalalaase looga abuuro dalka Itoobiya, iyadoo warbaahinta African intelligence oo uu u shaqeeynayay ay tilmaamtay in xariga wariyahaan uu yahay mid cudur la’aan ah, waxa ayna ku baaqday in si deg deg ah loo sii daayo.
“Eedaymaha been abuurka kuma saleysna wax cadeyn ah oo la taaban karo oo marmarsiinyo u noqon kara xorriyadda laga qaaday,” ayay tiri.
Wariyaha Faransiiska u dhashay ayaa dalka Itoobiya u joogay warbixin ku saabsan shir-madaxeedka ururka Midowga Afrika iyo warar kale, sida ay sheegtay Africa Intelligence oo ah warbaahintii uu ushaqeeynayay.
Waxa ay sheegtay sidoo kale in uu haysto dal-ku-gal u ogolaanaya in uu dalka ka shaqeeyo, dawladda Itoobiyana ay ka warhayaan hawsha loo diray.
Arintaan ayaa waxa ay kusoo aadeysaa iyadoo dhawaan maamulka Itoobiya uu xiray Muxudiin Maxamed oo ah wariye ka howlgala dowlad deegaanka Soomaalida.
Ururka saxafiyiinta gobolka Soomaalida ee loo soo gaabiyo (SRJA) ayaa ku baaqay in si deg deg ah loo sii daayo wariye Muhudiin Maxamed oo ay ciidamada ammaanka gobolku ay xireen 13-kii February, 2024-ka.
Sida uu sheegay Cabdirisaaq Xasan oo ah gudoomiyaha ururka saxafiyiinta gobolka Soomaalida, Muxudiin waxa loo xiray sababo la xiriira qoraalo uu ku soo qoray baraha bulshada oo uu kaga hadlay hakad ku yimid isku socodkii gaadiidka ee magaalada Jigjiga ee xarunta dawlad deegaanka Soomaalida, kadib booqashadii uu dhawaan ku tagay raysal wasaaraha Itoobiya Abiy Axmed.
Gudoomiyaha ururka saxafiyiinta ayaa shaaca ka qaaday in Muxudiin uu ku xirnaa xabsi aan la shaacin muddo 7 maalmood ah, isagoo aan wax dacwad ah lagu soo oogin. Kadib waxaa loo gudbiyay saldhigga booliska ee Aagga Faafan, wuxuuna ka soo muuqday maxkamadda 20kii bishaan Febraayo, isagoo wajahaya eedeymo ah inuu faafiyay dacaayad been abuur ah. Maxkamada gobalka ayaa 10-maalmood u ogolaatay boliiska si ay baaritaanada ugu sameeyaan.
Iyadoo ay sii kordhayaan qalalaasaha rabshadaha wata iyo dagaalada ka soconaya gudaha itoobiyaa ayaa maamulka itoobiya waxa uu bilaabay beegsiga saxafiyiinta madaxa banana iyo kuwa caalamiga ah si aan loo ogaan xaiiqada jirta.
