Muqdisho (SONNA):-In ka badan 136 ka tirsan khawaarijta oo ay ku jiraan horjoogayaal ayaa lagu dilay tiro kale oo ku dhow Boqol kalana waa lagu dhaawacay Howlgal qorshaysan oo Ciidanka Sirdoonka iyo Nabad Sugida Qaranka iyo Saaxiibada Caalamiga ah ay ka sameeyeen Dhul kayn ah oo u dhaxeeya tuulooyinka Tawakal iyo Garas Jeereed oo 12 KM galbeed ka jira Degmada Jannaale ee Gobolka Sh/Hoose, gaar ahaan Meel war biyood ah oo Khawaarijtu ugu yeeraan Warta Badar.
Howlgalkaan ayaa lagu beegsaday goobtaan oo muddo ay ku aruurinayeen maleeshiyaad badan oo ay ku doonayeen inay ku gaystaan weeraro ay ku dhibaateeyaan shacabka Soomaaliyeed.
Horjoogayaasha howlgalkaan lagu dilay ayaa waxaa ka mid ah
1. Horjoogaha howlgala Xeebta, Salmaan-dheere.
2. Horjoogaha u qaabilsan weerarada Janaale, Qoryooley, Bariire iyo Awdheegle, Macalin Salaxey.
3. Horjoogaha guud ee Jabhadaha G/Sh/Hoose, Macalin Xaashi.
Intii howlgalka uu socday waxaa la burburiyay Gaadiid dagaal iyo saanad hub ah oo ku jirtay goob u ahayd keydka hubka oo ku taala deegaanka uu howlgalka ka dhacay.
Aaggaan War biyoodka leh ee howlgalka laga sameeyay ayaa Khawaarijtu waxay ka samaysteen godad iyo teendhooyin ay isku qariyaan balse ciidanka Qaranka iyo Saaxiibada Caalamka ayaa ku burburiyay dhammaan,kaydkii halkaas u yaallay.
