Muqdisho,(SONNA):- Xafiiska Hantidhowrka Guud ee JFS ayaa ka qaybgalay aqoon-is-weydaarsi uu martigeliyay Xafiiska Hantidhowrka Guud ee waddanka Zambia, kaas oo ay isugu yimaadeen 24 dal oo Afrikaan ah, ayna soo qabanqaabisay Ururka AFROSAI-E, oo uu Xafiiska Hantidhowrka Guud ee Soomaaliya (XHGS) ka tirsan yahay.
Aqoon-is-weydaarsiga ayaa looga arrinsanayey “Doorka Hay’adaha Hantidhowrka Guud ee Dammaanad Qaadka, uga Faa’iideynta Muwaadiniinta Macdanta Laga Soo Saaro Dhulka” (Extractive Industries).
Aqoon-is-weydaarsigu wuxuu socday muddo afar maalmood ah, waxaana sidoo kale ka soo qaybgalay hantidhowrayaal ka kala yimid qaaradaha kale, quburo iyo daneeyayaal kala duwan. Gebogebadii, waxaa lagu soo xiray baaq lagu adkeynayo in dib loo milicsado istiraatiijiyadda maamulka wax-ku-oolnimada soosaarista macdanta, lana xoojiyo wada-shaqeynta iyo iskaashiga caalamiga ah ee arrimahaas la xiriira, si loo ilaaliyo deegaanka loogana faa’iideeyo muwaadiniinta khayraadka dabiiciga ah ee ku jira dhulkooda.
Xafiiska Hantidhowrka Guud ee JFS waxaa aqoon-is-weydaarsigan ku metelay hawlwadeeno sare oo ka tirsan shaqaalaha Xafiiska, kuwaas oo si firfircoon uga qaybgalay doodaha aqooneed ee lagu falanqeeyay dhammaan kulamadii dhacay, si loo dheelitirto baahida sii kordheysa ee loo qabo khayraadka dabiiciga ah iyo mas’uuliyadda dhowrista deegaanka.
