Lugogo(SONNA)-Xulkeenna qarka Soomaaliya ayaa ciyaari doona kulankoodii ugu dambeeyay ee heerka guruup-yada, iyagoo la dheeli doona xulka Eritrea, kulan qeyb ka ah tartanka bariga iyo bartamaha Afrika ee Cecafa Senior Challenge Cup.
Kulan ciyaareedkan ayaa ah mid aad u xiiso badan xulka qaranka Soomaaliya oo doonaya inuu u soo baxo wareegga xiga ee tartanka, halka Eritrea ay iyaguna doonayaan inay u soo gudbaan wareegga afar dhammaadka ama Semi-finalka tartanka.
Xulka qaranka Soomaaliya kulankii ugu dambeeyay waxa uu 1-0 ugu soo adkaaday xulka Burundi, halka Eritrea ay soo kala direen xulka Jabuuti, ciyaar ku dhammaatay 3-0.
Labadan Xul ayaa kuwada jira Guruup-ka A, waxaana ku wehliya xulalka kala ah; Jabuuti, Burundi iyo Uganda, waxaana Guruup-kan hoggaanka u haya xulka martigelinaya tartanka sanadkan ee Uganda oo leh 9-dhibcood, sidoo kale xulka Eritrea ayaa leh 6-dhibcood kuna jira kaalinta labaad, halka wiilasheenna Ocean Stars ay leeyihiin 4-dhibcood, waxayna ku taamayaan inay kala diraan xulka Eritrea si ay u xaqiijiyan u soo bixitaanka wareegga afar dhammaadka tartankan markoodii ugu horreysay taariikhda, inkastoo ay isha ku hayn doonaan xulka Jabuuti oo ay dhibcaha wadaagan.
Xulkeenna Soomaaliya waxaa qasab ku ah inay guul ka gaaraan Eritrea si ay ugu soo baxdo wareegga xiga, sidoo kalena Jabuuti ay ku hor kufto xulka Uganda, taasi waxa ay fursad wayn u tahay xulkeenna qaranka Soomaaliya oo markaas u soo bixi doona wareegga xiga ee tartanka bariga iyo bartamaha Afrika.
Sidoo kale, waxaa taagan sheeko kale haddii Soomaaliya ay 1-0 uga badiso Eritrea, balse ay Jabuuti dhiggeeda Uganda uga badiso 3-0, xulka qaranka Soomaaliya waa uu harayaa markaas, waxaana uu ku harayaa farqiga goolasha waaba haddii ay dhacdo.
Labadan xul ee Soomaaliya iyo Eritrea waxay hore isku soo arkeen labo kulan mid ka mid ah barobaro 0-0 ayey ku kala tageen, halka kulanka kale uu adkaaday xulka Eritrea, wuxuuna ku awood sheegtay 3-1, labadan kulan ayaa dhacay Sanadihii 2001 iyo 2009, midkaan galabta ayaana noqon doona midkii saddexaad oo labadaan kooxood dhex mara.
Ogeysiiska Ciyaarta:-
Tartanka: Bariga iyo bartamaha Afrika ee Cecafa Senior Challenge Cup
Taariikhda: Axad, 15 Dis 2019
Saacadda ay bilaabaneyso dheesha: 1:30 Duhurnimo xilliga geeska Afrika.
Xulalka: Somalia vs Eritrea
Garoonka: KCCA Startimes
Naatiijada kulankan iyo wax waliba oo ku saabsan ciyaarta ay dheelayaan wiilasha waddankeenna Soomaaliya waan idiin soo gudbin doonnaa hadduu Eebbe idmo.
