Liverpool(SONNA) Labada kooxood ee ugu guulaha badan taariikhda kubadda cagta England ayaa caawa isku qaban doona kulan ka tirsan horyaalka Premier League.
Liverpool ayaa garoonkeeda Anfield caawa oo Axad ah ku soo dhoweynaysa naadiga ay aadka u xafiiltamaan ee Manchester United, iyadoo koox waliba ay doonayso inay guul gaarto.
Kooxda uu hoggaamiyo Tababare Jurgen Klopp ee Reds ayaa haatan 13-dhibcood ku haysa hoggaanka horyaalka Premier League, laakiin waxa ay wajahayaan kooxda kalaiya ee illaa iyo haatan xilli ciyaareedkan dhibco ka lumisay, waana Manchester United.
Ogeysiiska Ciyaarta:-
Tartanka: England – Premier League
Taariikhda: Axad, 19 Jan 2020
Saacadda ay bilaabaneyso dheesha: 07:30 Habeennimo xilliga geeska Afrika.
Garsooraha: Craig Pawson (England)
Garoonka: Anfield
Wararka Kooxaha:-
Fabinho iyo Joel Matip ayay u badan tahay inay ku jiri doonaan shaxda kooxda Liverpool, kaddib markii ay tababarka buuxda dib ugu soo laabteen Arbacadii, markii ay ka yimaadeen dhaawacyo kala duwan oo canqowga iyo jilibka ah.
Kooxda ka dhisan Merseyside-ka ayaa markale waxaa ka maqnaan doona xiddigaha kala ah James Milner, Dejan Lovren iyo Naby Keita.
Dhinaca kale Weeraryahanka Kooxda Manchester United ee Marcus Rashford ayaa shaki laga galinayaa kulankan, kaddib markii uu soo gaaray dhaawac dhabarka ah, laakiin waxaa la siin doonaa illaa daqiiqadda ugu dambeysa si loo hubiyo taam ahaanshihiisa.
Luke Shaw, kaasoo isna qaba dhaawac muruqa ah ayaa sidoo kale la qiimiineyn doonaa xaaladdiisa.
Paul Pogba, Scott McTominay, Marcos Rojo iyo Axel Tuanzebe ayaa sii wadan doona maqnaanshahooda kulankan, inkastoo Eric Bailly laga yaabo inuu tartan u galo booskiisa kulankan, kaddib markii uu ciyaaray kulan albaabadu u xirnaa Talaadadii.
Xaqiiqooyinka ciyaarta:-
>- Tan iyo xilli ciyaareedkii 2013-14, Liverpool ayaa guuleysatay kaliya hal kulan 11-keedii kulan ee ugu dambeeyey Premier League oo ay wajahday Red Devils, waxaana ay ka haysataa 5 Barbaro iyo 5 Guuldarro.
>- Manchester United ayaa guul la’aan ah afarteedii kulan ee ugu dambeeyey oo ay u martisay lana dheeshay Liverpool tartammada oo dhan, waxaana ay kala soo laabteen Anfield 2 Barbaro iyo 2 Guuldarro tan iyo guushii 1-0 oo ay ka soo gaareen bishii Janaayo sanadkii 2016-kii horyaalka Premier League.
>- Liverpool ayaa khasaaro la kulantay 28 kulan oo horyaalka Premier League ay ku wajahday Manchester United, waana in siddeed mar ka badan kooxda kasta oo kale oo ay la ciyaartay.
>- Liverpool ayaa wajihi doonta garoonka Anfield kooxda Manchester United kulan horyaalka ah iyadoo maalinkaas hoggaanka u haysa horyaalka markeedii ugu horreysay tan iyo bishii September sanadkii 1990-kii, guushii 4-0 ee ay ku adkaatay kooxdii uu watay macallin Kenny Dalglish.
>- Manchester United ayaa khasaaro la kulantay labadii kulan ee ugu dambeeyey Premier League oo ay booqatay kooxaha ka dhisan Merseyside-ka ee Liverpool iyo Everton, weliba lagama badin saddex jeer oo xiriir ah kulammada sare ee horyaalka marka ay u martiyaan kooxahan horyaalka tan iyo bishii April sanadkii 1979-kii.
>- Liverpool ayaa guul gaartay 18-keedii kulan ee ugu dambeeyey horyaalka Premier League oo ay ku ciyaartay garoonkeeda.
>- Kooxda Liverpool ayaa ugu yaraan dhalisay 2 gool 17 ka mid ah 18-keedii kulan ee ugu dambeeyey oo ay ciyaartay horyaalka Premier League.
>- Kooxda Liverpool ayaa shabaqeeda gool ka ilaashatay lixdeedii kulan ee ugu dambeeyey oo ay dheeshay horyaalka Premier League.
