Bakool (SONNA):-Ciidamada Xoogga Dalka Soomaaliyeed ayaa howlgallo qorsheysan ka fuliyay deegaanno ka tirsan gobollada Bakool iyo Baay, ayaa khaarajiyay horjoogayaal iyo maleeshiyaad ka tirsan kooxda Khawaarijta Al-Shabaab.
Howlgal qorsheysan oo xalay ka dhacay tuulada Abal, oo qiyaastii 21 km uga beegan koofurta magaalada Xudur ee gobolka Bakool, lagu khaarijiyay horjooge sare oo lagu magacaabi jiray Maxamed Cabdi Maxamed Nuur, (Goofoow). Dhagarqabahan ayaa ahaa Amiirka Xisbada Saldhigga Tuulada Abal, wuxuuna ahaa maskaxdii ka dambeysay weerarradii argagixisada ee lagu dhibaateyn jiray shacabka gobolka Bakool. Intii uu howlgalka socday, ciidanku waxay gacanta ku dhigeen hub iyo dukumeentiyo muujinaya qorshayaal lagu maleegayay falal amni-darro ah.
Sidoo kale, howlgal kale oo ciidanku ka fuliyeen tuulada Waro Mintaaniya, oo 14 kiiloomitir Koonfur-bari kaga beegan deegaanka Burjeet ee gobolka Baay,ย ayaa lagu dilay laba xubnood oo muhiim ah oo ka tirsanaa kooxda Khawaarijta, kuwaas oo lagu kala magacaabo Yaxye (Abuu Khaalid), oo ka mid ahaa abaabulayaasha weerarrada argagixisada, iyo Shariif (Amiir), kaas oo u dhintay dhaawacyo culus oo uu ku qaaday howlgalka.
Wasaaradda Gaashaandhigga waxay bogaadineysaa geesinimada iyo naf-hurnimada Ciidanka Xoogga Dalka, kuwaas oo si joogto ah uga shaqeynaya xaqiijinta nabadda iyo xasilloonida dalka.
Wasaaraddu waxay mar kale xaqiijinaysaa in aysan jirin meel gabaad u noqon doonta kooxaha Khawaarijta iyo haraadigooda, iyadoo howlgalada lagu xasillinayo dalka oo dhan la sii dardargelin doono ilaa laga ciribtiro cadowga ummadda Soomaaliyeed.
