Muqdisho-(SONNA)-Guddoomiye ku-xigeenka 2-aad ee Golaha Shacabka Baarlamaanka Federaalka Soomaaliya mudane ; Mahad Cabdalla Cawad oo ay wehliyaan Guddoomiyaha Guddiga arrimaha bulshada ee Golaha Shacabka iyo Agaasimaha Guud ee Wasaaradda Dhallinyarada iyo Ciyaaraha ayaa maanta kormeer ku tagay Tuuladda Cayaaraha ee Stadium Muqdisho oo ay dib u dayactir iyo qurxin ku socoto, haatann maraya heer gabo-gabo ah.
Guddoomiyaha ayaa kormeeray dhamaan qeybaha uu garoonkan ka koobantahay sida qeybta kubada cagta oo qeybo ka mid ah roogii la fidiyay, tarabuunka ama qeybta loogu talo galay taageerayaasha iyo Madaxda daawashada cayaaraha dhacaya kasoo qeyb galeysa iyo qeybaha kale ee garoonka sida qolalka labiska cayaartoyda iyo hool loogu talo galay in ay shirarku ka dhacaan.
Agaasimaha Guud ee Wasaaradda dhallinyarada iyo cayaaraha ee Xukuumadda Federaalka Soomaaliya ayaa Guddoomiye kuxigeenka 2-aad ee Golaha Shacabka iyo madaxdii kale ee la socotay uga warbixiyay marxalidihii uu dib u dhiska garoonkan soo maray iyo qeybaha uu ka koobantahay.
Guddoomiyaha Guddiga Arrimaha Bulshada ee Golaha Shacabka Xildhibaan Cali Jowhar ayaa guul u soo wada hooyatay Ummadda Soomaaliyeed ku tilmaamay in dib loo soo nooleeyo garoonka cayaaraha ee Stadium Muqdisho.
Guddoomiye ku-xigeenka 2-aad ee Golaha Shacabka Mudane Mahad Cabdalla Cawad ayaa sheegay in diyaarinta meelaha is dhexgalka bulshada muhiimka u ah sida garoonkan oo kale ay qeyb ka tahay horumarada uu Dalka gaarayo ,Sidoo kalena uu dalkeena Hada horumaro Badan ka gaaray cayaaraha kala duwan sida kubada Cagta.
โWasiirka Wasaaradda Dhalinyarada iyo Isboortiga Xildhibaan Khadiija Maxamed Diiriye, Agaasimaha Guud Isaaq Xaashi, Maamulka iyo Lataliyeyaasha Wasaaradda dhamaantiin naga guddooma mahadnaq iyo boogaadin. Waxaan soo aragnay horumar iyo rajo aan la qiyaasi karin. Insha Allah 1da Luulyo 2020 waxaanu ku damaashaadi doonaa Stadium Muqdishoโ ayuu yiri Guddoomiye ku-xigeenka 2-aad ee Golaha Shacabka Baarlamaanka Federaalka Soomaaliya
