Muqdisho (SONNA)-Shir aan caadi aheyn oo golaha wasiirada Dowlad goboleedka Hirshabeelle ay ku yeesheen magaaladda caasimada ah ee Jowhar ayey ku ansixiyay miisaaniyadda 2020, taasi oo ay soo gudbisay Wasaaradda Maaliyada ee maamulkaasi.
Madaxweynaha Maamulka Hirshabelle Dr Maxamed Cabdi Waare ayaa shir Guddoominayay shirkaani, iyaddoo goob joog uu ahaa madaxweyne ku xiggeenka Mudane Cali Guudlaawe Xuseen, waxaana looga hadlay arrimo kale duwan oo la xiriira Miisaaniyadda 2020, Qatarta Cudurka Saameynta ba’an ku hayo aduunka ee Coronovirus, sida bulshadda looga wacyi galin lahaa qatartaas iyo Warbixino laga dhageystay qaar ka mid ah Wasaaradaha Hirshabeelle.
Golaha Wasiirada Maamulkaasi Hirshabeelle ayaa meel mariyay Miisaaniyadda 2020 oo ka kooban dakhliga gudaha ka soo xarooda iyo deeqaha laga helo dowladda dhexe iyo hay’adaha caalimiga ah, waxaana ay gaareysaa miisaaniyadaasi $14,010,984.
Sidoo kale golaha wasiirada Hirshabeelle ayaa si qoto dheer kaga hadlay saameynta cudurka qatarta badan Ee Coronovirus, iyagoo isku raacay in si wada jir ah looga shaqeeyo ka wacyi galinta bulshada cudurkaasi, waxaana la joojiyay Goobaha waxbarashada Sida Jaamacadaha, Iskuulada, dusiyada Quraanka mudo ku siman laba todobaad.
Baarlamaanka maamulka Hirshabeelle ayaa loo gudbin doonaa miisaaniyadda Golaha Wasiirada maanta ay ansixiyeen, si iyaguna ay codka ugu qaadaan.
