Muqdisho.(SONNA):- Wasiirka wasaaradda Caddaaladda iyo Arrimaha Dastuurka Xukuumadda Federaalka Soomaaliya Xasan Macallin Maxamuud ayaa maanta hor geeyay golaha Shacabka Baarlamaanka Jamhuuriyadda federaalka xubnaha gudiga madaxa bannaan ee dib u eegista iyo hirgelinta Dastuurka KMG ah oo ay dhawaan ay soo gudbiyeen golaha wasiirada xukuumadda.
Xubnahan oo ka kooban shan xubnood ayaa golaha waxay u qaadeen cod, waxayna ku ansixiyeen cod aqlabiyad ah, iyadoo aysan jirin mudane diiday ama ka aamusay.
Ansixinta ka dib, wasiirka wasaarada Caddaaladda iyo Arrimaha Dastuurka XFS mudane Xasan Macalin Maxamuud ayaa u mahadceliyay xildhibanada golaha shacabka sida aqlabiyada leh ay u ansixiyeen xubnaha guddiga madax bannaan ee dib u eegista iyo hirgelinta Dastuurka oo ay soo gudbisay wasaaradda Caddaaladda iyo Arrimaha Dastuurka.
Xubnaha la ansixiyay ayaa kala ah:
- Maxamed Xasan Idiris
- Axmed Maxamuud Jaamac
- Maxamed Cabdalla Saalax
- Farxiya Muumin Cli
- Burhan Aadan Cumar
Dhanka kale, Xildhibaanada golaha shacabka ayaa maanta ansixiyay hindise-sharciyeedkaย horumarinta iyo maareynta Kalluumaysiga Soomaaliyeed, waxaana ogolaatay 142, halka hal xildhibaan uu ka aamusay. Sharicigan ayaa waxaa soo gudbiyay Wasaaradda Kalluumeysiga iyo Dhaqaalaha Buluugga xukuumadda federaalka Soomaaliya.
Wasiirka wasaaradda Kalluumeysiga iyo Dhaqaalaha Buluugga Mudane Axmed Xassan Aadan ayaa uga mahadceliyay xildhibanada golaha shacabka sida aqlabiyada leh ay u ansixiyeen sharcigan oo muhiim u ah kor u qaadista Kheyraadka dalkeenna.
