Muqdisho (SONNA)-Maamulka gobolka banaadir ayaa ku dhawaaqay in dowladda hoose ee Xamar aysan ku filneen xal u helida saameynta ka dhalatay Roobabka ka da’ay Caasimadda.

Afhayeenka maamulka gobolka banaadir Salaax Cumar (saalax dheere) oo shir jaraa’id qabtay ayaa sheegay in dowladda hoose aysan awoodeeda ku filneen xaalada ka dhalatay saameynta roobabka isdaba jooga ah ee ka da’ay caasimada waxaana shacabka Soomaaliyeed, dowladda dhexe iyo beesha caalamka ugu baaqay inay ka qeyb-qaataan sidii wax looga qaban lahaa xaalada ka dhalatay.

Saalax Cumar afhayeenka maamulka gobolka banaadir waxaa uu sheegay in bankiga aduunka uu dowladda hoose u balan qaaday 37 milyan oo lagu kabayo dib u-dhiska goobaha biyo mareenada si loo furo goobahii xirmay.

Sidoo kale afhayeenka gobolka banaadir ayaa sheegay in roobabka ay da’ayeen sagaal bilood oo xiriiri ah isla markaana aan loo helin fursad wax lagu qaban karo marka laga reebo afartan iyo shan cesho ee uusan roob da’in, waxaana uu sababay in culeys uu ku noqday goobihii biyo fariinsinka ahaa ee hore loo sameeyay.

“Roobka waxaa uu caasimada ka da’ayaa ilaa iyo sagaal bilood oo xiriir ah marka laga reebo afartan iyo shan cesho ee uusan roob da’in hase ahaatee waxa uu saameyn xooggan ku yeeshay dhammaan goobihii biyo mareenada caasimada, kuwii hore loo dayactiray iyo kuwii kaleba” ayuu yiri Afhayeenka.