Paris(SONNA)-Weeraryahanka kooxda kubadda cagta PSG ee Edinson Roberto Cavani ayaa lagu soo waramayaa inuu ku jiro maalmihiisii ugu dambeeyay ee kooxda ka dhisan cariga Faransiiska sabab la xiriirta inuu isaguba doonayo u dhaqaaqisa koox kale oo xiiso u muujineysay dhawaanahan.
Sida warbixinta lagu sheegay Edinson Cavani ayaa maraya heerkii ugu dambeeyay ee uu kaga dhaqaaqi karo kooxdiisa Paris Saint-Germain xagaagan, maadaama uu codsaday in loo ogalaado inuu isaga tagi karo Kooxda suuqa bisha Janaayo.
Agaasimaha isboortiga kooxda Paris Saint-Germain ee Leonardo ayaa shaaca ka qaaday in waaya-aragga weerarka ka ciyaara uu kooxda u soo gudbiyay go’aankiisa kama dambeysta ah, isagoo intaa ku daray in kooxda uu agaasimaha u yahay ee PSG ay iska diiday dalab uga yimid Atletico Madrid.
Xiddiga heerka caalami ee dalka Uruguay ayaa muddo dheer la la xiriirinayay inuu ka tagayo kooxda haysata Ligue 1, isla markaana uu u dhaqaaqi doona Caasimadda Spain si uu ugu biiro Kooxda Atletico Madrid.
Weeraryahanka ku dhashay halka la yiraahdo Salto oo dhacda carriga Uruguay ayaa la dhibtoonayay dhaawac tan iyo bilawgii xilli ciyaareedkan, isagoo helay fursado yar oo uu ku matali karo Kooxda PSG, waxaana haatan uu diyaar u yahay inuu soo afjaro waayihiisa horyaalka Faransiiska, kaddib lix sano iyo bar uu joogay garoonka Parc de Princes.
Edinson Roberto Cavani Gómez oo PSG kaga soo biiray Kooxda reer Talyaani ee Napoli sanadkii 2013-kii ayaa Paris Saint-Germain u saftay kulamo gaaraya 195 ciyaarood, waxa uuna u dhaliyay 136 gool, xilli uu haatan si rasmi ah u doonayo inuu soo afjaro mustaqbalkiisa Kooxda reer France ee PSG.
