Muqdisho…SONNA…Ciidanka Xoogga Dalka Danab iyo bahwadaagtooda ayaa maanta mar kale jab culus u gaysteen argagixisada Alshabaab ee ku dhuumaaleysanaya goboladaa Mudug iyo Gaalgaduud.
Saakay barqadii abbaaro 10:21, meel u dhaxeysa magaalada Qaycad iyo degmada Xarardheere ayaa duqeyn cirka ah lagula beegsaday argagaxisada Al-shabaab.
Duqeyntaan ayaa lagu fuliyay kooxda Al-shabaab iyo hubkooda,mana jiraan wax dhibaato ah oo shacabka halkaa ku dhaqan ka soo gaaray duqeyntaasi.
Ciidanka XDS ee Danab ayaa haatan u ruuqaansaday inay ka sifeeyaan haraadiga Alshabaab ee ku harsan deegannada Galmudug.
Sarkaal u hadlay ciidanka ayaa sheegay in ciidanka Xoogga Dalka ee Danab marnaba aysan joojin doonin baacsiga Al-shabaab ilaa kooxdaasi laga sifeynayo goobaga ay ku dhuunaaleysanayaan.
