Muqdisho-(SONNA)-Guddoomiyaha Gobolka Banaadir ahna Duqa Magaalada Muqdisho, Dr. Xasan Maxamed Xuseen (Muungaab), ayaa Xalay casho sharaf ku maamuusay Guddoomiyaha Golaha Wakiillada Maamulka Waqooyi Bari Soomaaliya, Mudane Adan Cabdullahi Aw Xasan, oo maalmahan booqasho ku jooga magaalada caasimadda ah.
Munaasabadda oo ka dhacday hoyga Duqa Muqdisho ayaa lagu xusay xoojinta xiriirka iyo wadashaqeynta ka dhaxaysa maamullada dalka, iyadoo lagu muujiyay muhiimadda wadahadalka, wadatashiga iyo isku xirnaanta hayโadaha dowlad goboleedyada iyo dowladda hoose.
Munaasabadda waxaa ka soo qaybgalay Xildhibaanno ka tirsan labada aqal ee Baarlamaanka Federaalka Soomaaliya, Guddoomiye Ku-xigeenka Amniga iyo Siyaasadda, Md. Maxamed Axmed Diiriye (Yabooh), Guddoomiye Ku-xigeenka Howlaha Guud, Md. Cabdimajiid Daahir Aadan, Agaasimayaal, Siyaasiyiin, odayaal dhaqan iyo Marti-sharaf kale, kuwaas oo bogaadiyay dadaallada lagu dhisayo xiriir siyaasadeed iyo bulsho oo mideeya shacabka Soomaaliyeed meel kasta oo ay joogaan.
Dr. Xasan Maxamed Xuseen (Muungaab), ayaa sheegay in Muqdisho ay mar walba u furan tahay madaxda iyo shacabka Soomaaliyeed, isagoo carrabka ku adkeeyay in kulammada noocan oo kale ah ay muhiim u yihiin dhismaha kalsoonida iyo xoojinta midnimada qaranka.
Guddoomiyaha Golaha Wakiillada Maamulka Waqooyi Bari Soomaaliya, Mudane Adan Cabdullahi Aw Xasan, ayaa uga mahadceliyay Duqa Muqdisho martigelinta iyo soo dhoweynta diirran, isaga oo ku tilmaamay caasimadda meel u taagan Midnimada, Horumarka iyo Kobcinta Nabadda dalka.
