Guddoomiyaha Gobolka Banaadir ahna Duqa Magaalada Muqdisho Dr. Xasan Maxamed Xuseen (Muungaab) ayaa maanta Aqalka Dowladda Hoose ee Xamar ku qaabilay Wakiilka Xoghayaha Guud ee Qaramada Midoobe u Qaabilsan Soomaaliya ahna Madaxa Hawlgalka Taageerada Kala-guurka ee Soomaaliya Danjire James Swan.
Guddoomiye Muungaab ayaa Danjire Swan uga warbixiyay dadaallada Maamulka Gobolka Banaadir iyo Dowladda Hoose ee dhanka horumarinta iyo dib-u-dhiska Caasimadda, xaqiijinta amniga, dardargalinta adeegyada bulshada sida Caafimaadka iyo waxbarashada, xoojinta wacyigelinta iyo abaabulka bulshada ee loogu diyaargaroobayo Doorasho Qof iyo Cod oo ka dhacda Caasimadda iyo guud ahaan dalka.
Guddoomiyaha Gobolka Banaadir ahna Duqa Magaalada Muqdisho ayaa bogaadiyay kaalinta uu Xafiiska Qaramada Midoobe ku leeyahay taageeridda dowlad-dhiska iyo horumarinta dalka, gaar ahaan mashaariicda muhiimka ah ee ka socda Caasimadda, wuxuuna caddeeyay in maamulka ay ka go’an tahay xoojinta wada-shaqayn hufan oo lagu hirgelinayo barnaamijyada horumarineed.
Dhankiisa, Danjire James Swan ayaa ka mahahdnaqay soo-dhawaynta iyo warbixinta uu Duqa Magaalada ka siiyay hawlaha Gobolka ka socda, isaga oo ballanqaaday in ay sii joogtayn doonaan taageerada ay la garab-taagan yihiin meelmarinta qorshayaasha hortebinta u leh Caasimadda.
Kulanka waxaa qeyb ka ahaa Guddoomiye Kuxigeenka Amniga iyo Siyaasadda Maamulka Gobolka Banaadir Md. Maxamed Axmed Diiriye (Yabooh), Xoghayaha Guud ee Maamulka Gobolka Banaadir Marwo Bilan Bile Maxamuud iyo Agaasimeyaal ka tirsan Maamulka Gobolka Banaadir iyo Dowladda Hoose ee Xamar.
