Muddo 15 sano ah oo kooxda khawaariijtu ka talinaysay deegaanadda gobolka Shabeellaha Dhexe waxa maalin ba daaha laga faydayaa dhacdo murugo leh taas oo ka mid ah tacadiyaddii ay deegaanka ka geysatay kooxda khawaariijta, dhacdada aynu maanta dul istaagaynaa waa dhacdo murugo leh taas oo ka dhacday deegaanka Wargaadi oo ka tirsan degmadda Caddale ee gobolka shabeellaha dhexe.
Waa dhacdo muwaadin Soomaaliyeed kaas oo jidka ku safrayey ka dibna ay qabteen kooxda khawaariijta saacado kooban oo ay hayeen ka dibna waxay dhaafiyaan qudha ka dibna waxay ku jees jeeseen maydka marxuumka sida dadka deegaanka u sheegeen Wakaaladda Wararka SONNA.
Dhacdadan oo ay hore u tebisay SONNA ayaa dhowaan waxa deegaanka Wargaadi tegay koox ka socotay warbaahinta Qaranka ,S. Macallin Cumar oo ka mid ah dadka deegaanka Wargaadi ayaa warbaahinta u sheegay in muwaadinkan khawaarijtu dishay ka dibna Dadka deegaanku aaseen ayey khawaariijtu saddex cisho ka dib ku amreen dadka deegaanka in ay dib u soo bixiyaan maydka marxuumka sidoo kale waxay Sheekhii ku tukaday maydka ku amreen inuu kala doorto inuu dalka ka baxo iyo in ay shan xabaddood ku dhuftaan sheekhiina sidaas ayuu uga baxay dalka.
Kooxda Khawaariijta ayaa sidoo kale deegaannada ay xukumayeen Shacabka ku nool ku khasbay in ay dibbeda u soo bixiyaan maydadka Culimada ku aasan deegaannadaas iyo dadka magaca ku dhex lahaa bulshadda,tan oo ka dhigan in kooxda khawaariijtu duullimaad kusoo qaaday Diinta,dhaqanka iyo taariikhda ummada Soomaaliyeed.
Sheekh Maxamed oo ka mid ah Culimadda Soomaaliyeed ayaa mar uu u waramayey Radio Muqdisho ayaa la waydiiyey waxay Diintu ka qabto in qof dhintay xabaasha laga bixiyo ayaa wuxuu yiri” Shareecadda Islaamku waxay fartay in qofka muslimka ah markuu dhinto la aaso weliba qaabka loo aasayas waa qaab shareecaddu ina fartay sida in la dhaqo,la kafno laguna duugo xabaallaha Islaamka” Sheekh Maxamed oo hadalkiisa sii wata ayaa yiri nimanka khawaariijtu deegaannadii ay Xoogga ku haysteen waxyaabaha dambiyadda ay ka geysteen waxa ka mid ah in qof muslim ah ku xukumaan gaalnimo iyagoo ku bannaysanaya dhiigiisa iyo hantidiisa, halkaas oo ay ka muuqanayso in Diinta ay sheeganayeen beentood tahay diintana u isticmaaleen si shacabka u dhacaan waxay doonaana uga samaystaan.
Cadaadiska iyo dulmiga kooxda khawaariijtu ku haysay shacabka Soomaaliyeed ayaa sababay in shacabku qorriga qaataan halgan naf huris ahna u galaan siday isaga xorrayn lahaayeen khawaariijta arxanka daran ee dulmiga ku hayey shacabka Soomaaliyeed sharaftood,noloshooda iyo karaamadooda ummadnimo
