Muqdisho (SONNA): Diiwaangelinta doorashooyinka qof iyo cod ah ayaa si habsami leh uga socota Degmada Balcad ee gobolka Shabeellaha dhexe, waxaana maanta isdiiwaangeliyay Guddoomiyihii hore ee degmada Maxamuud Xuseen Gudbaaye.
Gudbaaye oo la hadlay warbaahinta xilliga uu qaadanayey shahaadadiisa diiwaangelinta، ayaa sheegay in dib u bilaabashada doorashooyinka qof iyo cod ah ee Balcad ay tahay “Guul taariikhi ah oo 57 sano kadib shacabka degmada u suurtagashay.” Waxa uu intaa ku daray in dadaalka lagu dhisayo dowladnimada uu mar walba ka imaan jiray halgan iyo go’aan mideysan oo bulshada Soomaaliyeed ay qaateen.
Diiwaangelinta Balcad ayaa qayb ka ah hawsha guud ee dalka looga hirgelinayo nidaamka doorashada qof iyo cod ah، iyadoo Guddiga Madaxa Bannaan ee Doorashooyinka Qaranka uu horey u sheegay in bixinta kaararka codbixinta laga bilaabay degmooyin dhowr ah oo ka tirsan gobolka Banaadir، taas oo u gogol-xaaraysa marxalad cusub oo ku dhisan hufnaan iyo ka-qaybgal bulsho.
Doorashooyinka deegaanka ayaa muhiim u ah dhismaha nidaamka dowlad-dhiska hoose، iyadoo qorsheynta horumarinta iyo adeegyada bulshada ay ku tiirsan yihiin golayaal si toos ah loo soo doorto. Hirgelinta nidaamkan cusub ee codbixinta ayaa loo arkaa tallaabo lagu xoojinayo isla xisaabtanka iyo in maamulka loo dhoweeyo shacabka.
