Muqdisho.(SONNA):- Xaaladdii ugu adkeeyay ayaa soo wajahday maleeshiyada argagixisada ee Al-shabaab haba ugu badnaadeene kuwa jabhadaha ah ee dhulka howdka ah kaga dhuumanaya howlgalka socda ee ciidamada Xoogga Dalka Soomaaliyeed ay ka wadaan gobollada Dalka ee lagu doonayo in dhammaan lagu ciribtiro maleeshiyaadka iyo horjoogayaasha Al-shabaab.
Horjoogayaasha sar sare ee Khawaarijta dhowr kullan oo ay isugu yimaadeen waxay isla garten inaan la heynin wax dhaqaalo ah oo la siiyo maleeshiyaadka ay u adeegsadaan dagaalka xaq-darada ah oo ay kaga soo horjeedaan horumarka iyo nabadda.
Waxay soo jeediyeen go’aan ah maleeshiyaadkii ka dhega adeego in ay sii wadaan dagaalka xaq-darada ah in bartiisa lagu toogto,amarna lagu siiyay horjoogayaasha horkacaya maleeshiyaadka jabhadaha ah.
Amarada adag ee horjoogayaashu ay dul dhigeen maleeshiyaadka Khawaarijta ah ee u dagaallamaya ayaa yimid ka dib markii ay dhammaan ay xirmeen goobihii ganacsiga ee ku yaallay deegaannada fara ku tiriska ee hadda ay ka joogaan Dalka.
Waxaa la sheegay in ganacsatadii lahayd goobahaas ganacsi ay soo xiraan,islamarkaana ay soo aadeen dhulka laga xoreeyay Khawaarijta Al-shabaab ka dib markii ay waayeen cid wax ka iibsata.
Khawaarijta Al-shabaab, ayaa si aad ah kaga carooday tallaabada ay ku dhaqaaqeen ganacsatada, taas oo rejo xumo ku ridday maleeshiyaadka Al-shabaab.
Wararka aan ka heleyno deegaannada ay ku dhuumaaleysanayaan Khawaarijta ayaa sheegaya in horjoogayaasha iyo maleeshiyaadka ay go’aansadeen in ay soo wada baxaan,maaddaama lagu wargeliyay inaan la hayn dhaqaalihii lagu masruufi lahaa, horjoogayaasha dhaqaalaha haysta ayaa la sheegay in ay ku adkeysanayaan in aysan bixin wax dhaqaalo ah.
Haddii uu fulo amarka ay horjoogayaasha Khawaarijta ee ku aaddan inaan wax dhaqaalo ah la siin karin maleeshiyaadka u dagaallamaya, maaddaama la waayay dhaqaallihii soo geli jiray Khawaarijta.
Waxaa la is weydiinayaa ma sii socon doonaa dagaalka maleeshiyaadka Khawaarijta ay kala hortagayaan ciidamada Xoogga Dalka Soomaaliyeed iyo dadka deegaanka oo iskaashanaya, Khawaarijtu in ay jabtay soo ma cadda?
