Muqdisho-(SONNA)-Wasiirro iyo xildhibaano katirsan DFS, Guddoomiyaha Gobolka Banaadir ahna Duqa Magaalada Muqdisho, Madaxweyne ku-xigeenka Dowlad Goboleedka Hirshabeele iyo rugta ganacsatada Soomaaliyeed ayaa dhowr goobood oo kamid ah Gobolka Shabeellada dhaxe kormeer ku sameeyay si ay sahmin ugu sameeyaan halka ku haboon in laga hirgeliyo Garoon Diyaaradeed oo casri ah.
Masโuuliyiintaan waxaa kormeer kooda ku wehlinaayay Khubaro ku xeel-dheer sahminta Garoomada Diyaaradaha, waxayna madaxda iyo Khubaradu isku raaceen in degaanka Maaxaay oo hoostaga Degmada Warsheekh ee Gobolka Shabeellada dhexe ay tahay halka ku habboon in laga hirgeliyo Garoonka cusub oo cabirkiisu gaarayo 14-km.
Qaar kamid ah Odayaasha iyo culimada degaanka oo warbaahinta la hadlay ayaa Dhulkooda ugu yaboohay Qaranka iyo in loogu shaqeeyo danaha Ummadda Soomaaliyeed.
Guddoomiyaha Gobolka Banaadir ahna duqa Magaalada Muqdisho mudane ; Cumar Maxamuud Maxamed (Cumar Filish), ayaa sheegay in degaanka Maaxaay uu yahay goob istaraatiiji ah oo ku wanaagsan in laga dhiso Garoon casri ah oo meteli kara guud ahaan Dalka.
Wasiirka Gaadiidka ย iyo duulista hawada Soomaaliya, Maxamed C/llaahi Salaad (Oomaar) ayaa sheegay in Dowladda Soomaaliya ay Sanadaha soo socda soo gaba-gabeyn doonto mashruucaan lagu dhisayo Garoon caalami ah oo magaalada Muqdisho ay yeelato.
Garoonkaan ayaa haddii la hirgeliyo noqon doona kii ugu weynaa ee Dalku uu yeesho, wuxuuna dabooli doonaa baahiyo badan maadaama uu noqon doono mid baaxad weyn oo la jaanqaadi kara Garoomada Caalamiga ah ee Dunida.
