Gaalkacyo-(SONNA)-Ciidanka xoogga dalka Soomaaliyeed iyo kuwa deegaanka ayaa xalay howlgallo qorsheysan ka fuliyay deegaanka Ceel-saacid ee koonfurta gobolka Mudug.
Ciidamada is-garabsanaya ayaa howlgallo qorshaysan kubeegsaday saldhigyo iyo gaadiid dagaal oo ay kooxaha khawaarijta ku haysteen deegaankaas.
Saraakiisha Ciidammada ayaa xaqiijiyay in howlgallada lagu beegsaday saddex ka mid ah gaadiidka dagaalka ee khawaarijta, iyagoo intaa ku daray in ay xoojinayaan dedaallada ay dowladdu ugu jirto ka hortagga iyo ciribtirka kooxahan argagixisada ah ee ku sugan qeybo ka mid ah dalka.
Saraakiishu waxa ay sidoo kale sheegeen in howlgalladan ay qayb ka yihiin qorshayaasha amni ee ka socda gobolka Mudug, kuwaas oo lagu xoojinayo amniga iyo xasiloonida deegaannada ay khawaarijtu ka joogaan.
Ciidammada Xoogga iyo kuwa deegaanka ayaa u muuqda in ay si wadajir ah uga shaqeynayaan hawlgallada lagu ciribtirayo khawaarijta, iyada oo ujeedaduna ay tahay in la xaqiijiyo amniga shacabka iyo dhismaha dowladnimada.
