London(SONNA)-Kooxda kubadda cagta Chelsea ayaa la soo warinayaa inay diyaar u tahay inay dalab rasmi ah ka gudbiso weeraryahan ka tirsan naadiga reer Talyaani ee AC Milan.
Blues ayaa la rajanayaa inay dalabkaan ka gudbiso suuqa kala iibsiga bisha Janaayo dhaliyaha kooxda AC Milan ee Piatek.
Warsidaha Calciomercato ayaa warinaya in Chelsea ay diyaar u tahay inay dalab ka gudbiso Weeraryahanka Milan ee Krzysztof Piatek haddii laga qaado bisha Janaayo ganaaxa ka saaran suuqa kala iibsiga xiddigaha.
Blues ayaa ganaax laga saaray labada suuq kala iibsi ee soo aaddan oo uu ku jiro kan bisha Janaayo, kaddib markii ay jabisay sharciga saxiixa xiddigaha ay da’doodu ka yar tahay 18-ka sano.
Si kastaba ha noqotee, waxay kalsooni ku qabaan in xayiraadaas la qaadayo suuqa jiilaalka, haddii ay sidaas dhacdana waxa ay sameeynayaan dalab 35 milyan oo euro ah oo u dhiganta 30 milyan oo gini ama 38 milyan oo dollar kaasoo loogu talagalay weeraryahanka reer Poland ee Piatek.
Krzysztof Piatek ayaana noqon kara kan ugu horreeya oo ay la soo wareegi doonto kooxda ka dhisan galbeedka Magaalada London ee Chelsea oo baadi goob xooggan ugu jirta weeraryahan cusub.
