Muqdisho (SONNA): Guddoomiye Ku-xigeenka Guddiga Madaxa-bannaan ee Xuquuqul Insaanka Qaranka (GMXIQ), Mudane Maxamed Haaruun Maxamuud, ayaa maanta kulan kula yeeshay magaalada Muqdisho Danjiraha Dowladda Switzerland u fadhiya Soomaaliya, Mudane Mirko Giulietti.
Kulanka ayaa diiradda lagu saaray xaaladda guud ee xuquuqda aadanaha dalka, caqabadaha jira iyo fursadaha horumarineed, iyadoo sidoo kale laga wada hadlay xoojinta iskaashiga labada dhinac iyo sidii loo hormarin lahaa dadaallada ku wajahan ilaalinta iyo horumarinta xuquuqul insaanka Soomaaliya.
Mudane Maxamed Haaruun ayaa Safiirka la wadaagay marxaladda uu marayo Guddiga oo weli ku jira wejigii aasaaska iyo dhismaha hay’adeed, isagoo carrabka ku adkeeyay in Guddigu uu u shaqayn doono si madax-bannaan, dhexdhexaad ah, isla markaana waafaqsan heerarka caalamiga ah ee xuquuqda aadanaha, gaar ahaan Mabaadii’da Paris. Waxa uu xusay muhiimadda ay leedahay in la dhiso hay’ad leh kalsoonida bulshada Soomaaliyeed iyo awood ay ku gudato waajibaadkeeda si hufan oo daahfuran.
Danjiraha Switzerland, Mudane Mirko Giulietti, ayaa dhankiisa muujiyay danayn xooggan oo ku aaddan fahamka qorshaha iyo himillada Guddiga, isagoo xusay kaalinta ay Switzerland ka qaadato taageerada arrimaha dowlad-wanaagga, sharciga iyo xuquuqda aadanaha ee Soomaaliya.
Labada dhinac ayaa sidoo kale isla gartay muhiimadda iskaashi dhow oo ku saleysan taageero farsamo, dhisidda awoodda iyo wada-shaqeyn joogto ah si loo xoojiyo ilaalinta xuquuqda aadanaha dalka.
