Muqdisho(SONNA);-waxaa magaalada Muqdisho lagu soo gabagabeeyay shir muddo shan maalmood socday oo looga hadlayay arrimaha isbeddelka cimilada iyo nidaamka helidda maalgelinta cimillada ee Soomaaliya, kaas oo uu hoggaaminayay Sanduuqa Qaran ee Isbeddelka Cimilada (NFC).
Shirkan ayaa diiradda lagu saaray qiimeynta baahiyaha maalgelinta cimilada ee Soomaaliya iyo sida ugu habboon ee dalka uga faa’iidaysan karo fursadaha jira. Intii uu socday shirka ayaa guud ahaan lagu falanqeeyay baahiyaha maalgelinta cimilada, iyadoo sidoo kale dooddo lagula yeeshay Ururka Bangiyada Soomaaliyeed oo ku saabsanaa hal-abuurka maaliyadeed, iyo hoggaanka NFC, kuwaas oo horseedi doona barnaamij gaar ah oo mustaqbalka loogu talagalay bangiyada dalka si loo xoojiyo helitaanka maalgelinta isbeddelka cimilada.
Mas’uuliyiin sare oo ka socday Wasaaradda Maaliyadda Soomaaliya, Bangiga Horumarinta & Dib-u-dhiska Soomaaliya (SDRB), iyo Sanduuqa Qaran ee Isbeddelka Cimilada ayaa shirka kaga hadlay hannaanka helitaanka maalgelinta cimillada, iyagoo soo bandhigay fursadaha ka jira Sanduuqa Cimilada Adduunka (GCF) iyo Sanduuqa La-qabsiga.
“Shirkan shanta maalmood socday wuxuu aas-aas u yahay diyaar-garowga Dowladda Soomaaliya ee ku aaddan sidii ay si toos ah u heli lahayd maalgelinta cimilada, loona maareyn lahaa si waafaqsan nidaamyada dowliga ah ee soo hagaagaya,” ayuu yiri Liibaan Obsiye, Agaasimaha Fulinta ee NFC.
Soomaaliya haatan waxay ku tiirsan tahay hay’ado caalami ah iyo kuwo qaran oo leh aqoonsiga GCF iyo Sanduuqa La-qabsiga si loo fuliyo mashaariicda la xiriira cimilada, inkasta oo ay ka mid tahay dalalka ugu nugul saamaynta taban ee isbeddelka cimilada, ayna aad u yar tahay qiiqa ay ka qeyb qaadato marka la eego heerarka caalamiga ah.
Shirka waxaa sidoo kale ka qaybgalay xubno sare oo ka socday Xafiiska Ra’iisul Wasaaraha, Wasaaradda Qorsheynta, Wasaaradda Deegaanka iyo Isbeddelka Cimilada, Wasaaradda Beeraha, Golaha Dhaqaalaha Qaranka, iyo UK FCDO Pioneer Country Trials — oo Soomaaliya ku dartay waqtigii COP28 laba sano ka hor isla markaana taageero farsamo siiya Sanduuqa Qaran ee Isbeddelka Cimilada (NCF).
