Muqdisho-(SONNA)-Guddoomiyaha Maamulka Gobolka Banaadir ahna Duqa Magaalada Muqdisho, Dr. Xasan Maxamed Xuseen (Muungaab), ayaa xafiiskiisa ku qaabilay Safiirka Turkiga ee Soomaaliya, Danjire Alper Aktas oo booqasho sharafeed ku soo gaaray Aqalka Dowladda Hoose ee Muqdisho.
Dr. Muungaab oo Safiirka ku soo dhoweeyey hab-maamuus walaalnimo, ayaa kala hadlay muhiimadda xiriirka Turkiga iyo Soomaaliya uu u leeyahay dib-u-dhiska, nabadgalyada, iyo horumarka Caasimadda.
Wuxuu xusay kaalinta Turkiga ee taageeradii bani’aadannimo ee sannadkii 2011 ka bilaabatay iyo iskaashiga istiraatiijiga ah ee hadda ka socda, oo ay ka mid yihiin dib-u-dhiska kaabayaasha dhaqaalaha, carbinta ciidamada, la-dagaalanka argagaxisada, horumarinta adeegyada bulshada, iyo mashaariic waaweyn sida dhismaha saldhigga dayax-gacmeedka.
Guddoomiyaha Gobalka Banaadir ayaa ballanqaaday in maamulkiisu uu mar kasta diyaar u yahay fududeynta maalgashiga iyo barnaamijyada horumarineed ee ay Turkigu ka hirgelinayaan Muqdisho.
Wuxuu sidoo kale la wadaagay Safiirka danaynta Dowladda Hoose ee Muqdisho ee ku saabsan iskaashiga khibrad-is-weydaarsi ee magaalooyinka waaweyn ee Turkiga, si loo xoojiyo adeegyada aasaasiga ah, sida; nadaafadda, waddooyinka, bullaacadaha, dab-damiska, iyo gurmadka degdegga ah.
Safiirka Turkiga, Danjire Alper Aktas, ayaa dhankiisa caddeeyay in dalkiisu mar kasta taageero shuruud la’aan ah u fidiyo dadaallada dawlad-dhiska, nabadaynta, horumarinta Soomaaliya, iyo taageerada ajendaha Doorashada Qof iyo Codka ah ee Caasimadda iyo gobollada looga diyaargaroobayo.
