Muqdisho, (SONNA) Guddoomiye ku-xigeenka labaad ee Golaha Shacabka Baarlamaanka Federaalka Soomaaliya, Mudane Cabdullaahi Cumar Abshirow, ayaa maanta shir guddoomiyay kulan rasmi ah oo uu yeeshay Guddiga Miisaaniyadda, Maaliyadda, Qorsheynta iyo La-xisaabtanka Hay’adaha Dowladda.
Kulanka oo ka dhacay xarunta Villa Hargeysa, gaar ahaan xafiiska guddoonka iyo guddiyada, ayaa lagu doortay Guddoomiyaha cusub ee guddiga, waxaana cod buuxa loogu doortay Xildhibaan Cabdi Ibraahim Warsame (Qawdhan), oo beddelaya Guddoomiyihii hore, Xildhibaan Maxamed Faarax Nuux, oo dhowaan loo magacaabay Wasiirka Wasaaradda Gaadiidka iyo Duulista Hawada Soomaaliya.
Guddoomiye ku-xigeenka labaad ee Golaha Shacabka, Mudane Abshirow, ayaa dardaaran u jeediyay Guddoomiyaha cusub, isaga oo ku dhiirrigeliyay inuu dardargeliyo shaqada guddiga, islamarkaana uu la shaqeeyo dhammaan xubnaha kale si loo xaqiijiyo hufnaanta iyo isla xisaabtanka hay’adaha dowladda.
Doorashada guddoomiyahan cusub ayaa imanaysa xilli muhiim ah, iyadoo guddigu uu door weyn ku leeyahay dabagalka miisaaniyadda iyo la xisaabtanka hay’adaha dowladda, taasoo ah tiir muhiim u ah maamulka wanaagsan iyo daahfurnaanta dowladda.
