Muqdisho-(SONNA)-Ciidamada Qaranka iyo geesiyaasha xaq u dirirka ah ee gobolka Hiiraan ayaa saakay Khawaarijta ku laayay aagga deegaannada Beera yabaal iyo Aboorrey oo hoos taga degmada Buuloburde ee gobolka Hiiraan, halkaas oo lagu soo bandhigay meydadka Khawaarijta, hub iyo gaadiid dagaal oo cadowga laga furtay.
Ciidamada ayaa waaberigii hore ee saakay fashiliyay weerar naf lacaarinimo ah oo ay Khawaarijtu ku qaaday goobaha saakay lagu laayay, waxaana weli dhulka howdka ah ee dhaca jiinka Wabiga Shabeelle ka socda baacsiga firxadkii Khawaarijta.
Saraakiisha hoggaamineysa howlgalka ka socda Hiiraan ee jabka culus lagu gaarsiiyay Khawaarijta ayaa warbaahinta Qaranka u sheegay in goordhow ay bulshada la wadaagi doonaan faah-faahinta sida loo fashiliyay dhagartii argagixisada, isla markaana ay soo bandhigi doonaan khasaaraha rasmiga ah ee la gaarsiiyey Khawaarijta.
