Muqdisho.(SONNA):- Ku-xigeenka Hantidhowraha Guud ee JFS, Mudane Cabdi-Jamaal Cusmaan Maxamed ayaa maanta si rasmi ah uga furay magaalada Muqdisho shir muhiim ah oo socon doona muddo shan maalmood ah. Shirka waxaa ka qaybgalaya mas’uuliyiin ka tirsan Xafiisyada Hantidhowrka Guud ee heer federaal iyo heer Dowlad gobolleed.
Ujeedka shirkan ayaa ah in la gorfeeyo dhammeystirka qaab-dhismeedka iskaashiga iyo wada-shaqeynta xafiisyada Hantidhowrka Guud ee labada heer,arrintan waxa ay ka soo baxday shirkii sanadlaha ahaa ee labada dhinac ay yeesheen sanadkii hore, iyada oo qayb ka ah istiraatiijiyadda Xafiiska Hantidhowrka Guud ee JFS.
Waxaa la filayaa in shirka laga soo saaro heshiis rasmi ah oo dhinacyadu ay wada saxiixaan, kaas oo qeexaya habka wada-shaqaynta labada heer, waaxda xiriirka Dowlad Gobolleedyada ee xafiiska Hantidhowrka Guud ayaa door muhiim ah ka ciyaaraysa isku-xirka doodaha iyo soo bandhigidda fikradaha ka qaybgalayaasha inta uu shirku socdo.
Shirkan ayaa ah tallaabo muhiim ah oo kor u qaadaysa wada-shaqaynta iyo hufnaanta hay’adaha hantidhowrka, si loo xaqiijiyo mas’uuliyadda iyo daahfurnaanta la xiriirta maamulka kheyraadka dowladda.
