Muqdisho.(SONNA): Ciidamada ammaanka Galmudug ayaa gacanta ku soo dhigay nin loo heysto inuu xalay dil u geystay L/Xidigle Xasan Quuri oo ahaa Sarkaal ka tirsan Booliska Soomaaliya, qeybta Galmudug.
Dilka Sarkaalka, ayaa xalay ka dhacay magaalada Dhuusamareeb ee xarunta maamulka Galmudug, waxaana howlgal ay fuliyeen ciidamada amniga lagu soo qabtay ninkaan.
Saraakiisha hoggaamineysay ciidamada howlgalkan fuliyay ayaa warbaahinta Qaranka u xaqiijiyay in hadda uu ku socdo baaritaanka eedeysanaha la soo qabtay,islamarkaana sida ugu dhaqsiyaha badan sharciga loo horkeeni doono.
Taliyaha Saldhigga Booliiska magaalada Dhuusamareeb Dhamme Nuur Cilmi oo la hadlay Warbaahinta ayaa faah faahiyay eedeysanayaal loo soo qabtay dilkii xalay loo geestay Alle ha unaxariistee L/Xidigle Xasan Quuri oo ka tirsaan Ciidanka Booliiska Soomaaliyeed, qeybta Galmudug.
Wuxuu sheegay in marxuumka la dilay xilli uu goobtiisa shaqo ka rawaxay, islamarkaana uu ku sii jeeday gurigiisa, wuxuuna hadalkiisa intaas ku daray in gacanta lagu haayo koox eedeysanayaal ah halka kuwo kale oo la tuhmayana lagu daba jiro iyagana gacanta lagu soo dhigi doono.
