Muqdisho(SONNA);-Safiirka Turkiga ee Jamhuuriyadda Federaalka Soomaaliya Mudane Fatxu-diin Maxamed Cali ayaa shalay kaga qayb galay magaalada Ankara xaflad aad loo soo abaabulay oo lagu xusayay 61-guuradi ka soo wareegtay aasaaskii Ururka Midowga Africa.
Munaasabadda oo heerkeedu sarreeyo waxaa ka qeyb-galay danjirayaasha Afrikaanka ah, iyo madax kale oo ka socday dowlada Türkiye, iyadoo madasha laga sheegay muhiimadda midnimada iyo wadajirka qaaradda u leedahay horumarka dadkeeda.
Dhanka kale Siihayaha Safaaradda Soomaaliya ee Uganda Mudane Cabdiladiif Maxamuud Cali ayaa shalay kala qayb galay munaasabadda maalinta Afrika ee sanad walba maanta oo kale la xuso taasoo lagu qabtay fagaaraha wayn ee Kololo ee magaaladan Kampala.
Jaaliyadda Soomaaliyeed ee ku nool dalkan Uganda ayaa halkaas kusoo bandhigay dhaqankeena iyo astaanta qarankeena iyo ciyaaro dhaqameed lagu muujinayay waxyaabaha dadkeena iyo dalkeenu gaarka u leeyihiin.
Sidoo kale jaaliyadaha kala duwan ee dalalka Afrika ayaa halkaas iyaguna kusoo bandhigay dhaqamadooda iyo waxyaabaha ay gaarka u leeyihiin
Xaflado lagu wayneynayo maalinta wayn ee aas-aas-ka Midowga Afrika ee ku beegan 25-ka May 1963 ayaa ka kala dhacaya gudaha iyo meelo badan ee dalka dibadiisa ah kuwaas oo ay ka qeyb galeen mas’uuliyiin ka tirsan dowladda Soomaaliya.
